Mi peticion di Augustus 2011 pa duna e prome edificio di Havenmeester di Aruba e nomber Edificio Maarten Noot a keda aproba pa tur e instancianan concerni. Na cuminsamento di 2014 cu e restauracion tabata cla, un miembro di gabinete di Ministerio di Infrastructura a invita mi pa e reapertura oficial. Na ultimo momento e reapertura no a tuma luga, supuestamente pasobra e landscaping no tabata cla ainda. Algun luna despues gobierno a cuminsa uza e edificio, pero sin fanfare, y ami nunca mas a tende algo di e nombramento. Esaki naturalmente ta lanta algun pregunta den mi mente. Pakico gobierno nunca a ehecuta e nombramento di e edificio oficialmente? Pakico no tabatin un ceremonia oficial di reapertura manera ta tradicion aki? Pakico nunca tabatin un aviso di gobierno cu e edificio oficialmente a haya e nomber Maarten Noot?
Ken ta Maarten Noot?
Maarten Noot tabata e Havenmeester cu a logra convence Gobierno Colonial na Corsou cu Aruba tabatin mester di un edificio pa Loodswezen urgentemente. Su esfuersonan pa haya un oficina nobo no tabata pa satisface ningun vanidad. Loke tabata pasa pa oficina di loods na aña 1938 cu Maarten Noot a yega Aruba tabata nada mas cu un mangasina na pia di Waf chikito. Maarten Noot a yega di skirbi cu den tempo di yobida, e sapatonan di e trahadonan tabata muha cu e awa cu tabata subi riba e vloer di cement kibra y e mester a bay traha cu laars. Den lunanan di secura, e biento tabata pasa libermente pa e buracunan den e bentananan y tabata frega su cara cu stof manera schuurpapier.
Despues di un lucha di casi cuater aña cu a cuminsa na1938, Maarten Noot por fin por a ocupa e oficina nobo di Havenmeester na final di 1941. Asina mes, Gobierno Colonial na Corsou a exigi pa Loodsdienst comparti e edificio cu Brandweer ya cu e dos trucknan di paga candela a haya nan garage parti abou di e edificio, dilanti di Politiewacht.
Maarten Noot a laga traha no uno, ni dos, pero tres oficina di Havenmeester. Na Juni 1945 el a bira Havenmeester di San Nicolas. Aya, e oficina tabata pio cu lo ke el a haya na Playa na 1938! Atrobe el a cuminsa un lucha cu Gobierno Colonial. E biaha aki, e lucha a dura ainda mas largo! Ta te na aña 1952 un oficina pa e Havenmeester di San Nicolas a keda completa. Na aña 1954 cu Maarten Noot a bay cu pensioen, e kantoor nobo di Havenmeester di Oranjestad cu ta na entrada di waf no tabata traha ainda, pero ta Maarten Noot a percura pa e placa ta riba presupuesto pa su di tres oficina.
Bou di Maarten Noot como Havenmeester di Aruba, nos haf a experiencia cambionan grandi. Esun di mas balor pa nos economia indudablemente a tuma lugar na 1947 cu Standard Dredging Co. a coba pabou di Waf Grandi (Cornelis Eman Kade) y asina permiti bapornan grandi pa drenta y sali di haf di tur dos banda. Na April 1948 e bapor Helicon di KNSM a drenta haf di Playa di banda pabou y asina a habri caminda pa bapornan di turista cu eventualmente lo contribui grandemente na economia di Aruba. Otro enorme avance tambe cu a tuma luga den tempo di Maarten Noot tabata e construccion di “basinnan” cu a aumenta e capacidad di waf te 4 mil pia.
Maarten Noot tabata stima su trahadonan manera famia. Yiunan di difunto Miguel Odor y “Neu” Tromp, e dos personanan cu mas aña a traha cu ne, por comproba cu e tabata un hefe cu tabata trata su empleadonan cu respet y cariño. Pa cada un di nan, Noot a organisa un bunita homenahe dia cu nan a cumpli 25 aña di servicio cu Loodswezen y personalmente el a duna un discurso prepara di antemano di dos pagina getype. Ta cuanto cabesante di departamento di gobierno ta haci esey pa su empleadonan? Sr. Miguel Odor y su señora esposa pa varios luna a hospeda na e cas (cu e nomber Arubiano “Mira Tanki”) di famia Noot na Hulanda.
Como miembro di Rotary Club y Algemeen Nederlandsch Verbond (ANV), Maarten Noot a contribui na causanan social, cultural y filantropico na Aruba. Tambe el a sirbi den e “Aruba Hulp-Fonds voor Nederland” despues cu Hulanda a keda libera na 1945. Como cineast y fotograf amateur Maarten Noot a saca hopi film y portret cu el a regala nos Biblioteca Nacional. Un di su filmnan ta documenta e progreso den construccion di e prome oficina di Havenmeester. Como artista plastico, Maarten Noot a pinta hopi acuarel di paisahe y casnan historico di Aruba y a regala varios na su empleado y amigonan. Por cierto, ami a regala gobierno dos di nan pa e edificio cu ta carga su nomber. Mi ta supone cu nan ta colga den un di e oficinanan den e edificio.
E amor cu Maarten Noot tabatin pa Aruba no a muri cune. Su yiu, Jan cu a emigra pa Australia, a hereda e amor cu su tata tabatin pa nos isla. Su villa pafo di Sydney, ta yama Villa Aruba. Tur seis yate cu Jan a yega di tin a haya e nomber Aruba. Prome cu su edad halto a stop e di biaha, cada bes cu Jan bay vacantie pa Hulanda e tabata pasa un siman of dos na Aruba pa bishita su amigonan cu ken e ta mantene contacto regularmente y e tabata keda na cas di su amiga di tempo di mucha, Sra. Sheila Lampe, prima di Padú. Pa su lealtad na Aruba a pesar di e distancia largo for di nos, Aruba Tourism Authority (ATA) a presenta na Jan e certificado di Goodwill Ambassador na 2010.
Despues di uza e edificio dos aña, a bira tempo pa gobierno ehecuta e nombramento di e edificio oficialmente. Despues di dos aña, a bira tempo pa gobierno tene e ceremonia oficial di reapertura manera ta tradicion aki. Despues di dos aña, a bira tempo pa gobierno laga pueblo sa cu e edificio oficialmente a haya e nomber Maarten Noot. Mi ta spera cu e autoridadnan concerni pronto lo por haci un tempo pa un ceremonia pa desvela un plachi pega na e edificio cu lo bisa: Edificio Maarten Noot.