Despues di varios luna sin duna ningun declaracion of informacion di e situacion cu keto bay ta surgi na Fundacion Lotto pa Deporte, minister Dangui Oduber ta haya importante pa informa comunidad riba e ultimo desaroyonan.
Algun siman atras minister Oduber a ricibi un carta di retiro di ex miembro di e hunta di supervision Sra. Benvinda De Souza. En todo caso, Sra. De Souza si a tene honor na su mes y acepta su eror y a dicidi pa retira su mes for di e hunta di supervision di Fundacion Lotto pa Deporte. Ora cu minister Oduber a kere cu e otronan, teniendo na cuenta cuanto fiesta a wordo haci cu placa di deportistanan, nan tambe lo a tene honor na nan mes. Loke mas ta resalta tambe ta e echo cu sentencia di hues a wordo posponi pa 7 bes caba, algo cu NO ta usual!
Esaki NO a sosode y minister Dangui Oduber a dicidi di pa prome biaha di bay sinta na mesa cu e hunta di supervision di Fundacion Lotto pa Deporte. Durante e reunion aki minister Oduber a presenta un gran cantidad di prueba caminda ta ser prueba cu tin mal maneho financiero, no tawata tin control, mucho menos supervision y e hunta di comisario ta mas cu complice y culpabel di tur loke ta sosodiendo den FLPD. Tin cu pensa riba uzo di celular door di miembronan den 4 luna di tempo na un costo di 13.0000 florin. Tin di pensa na contractnan di buffet di abogado di miles di florin di miembronan di hunta di supervision pa nan mesun buffet. Tin di pensa na biahenan di placer na balor di 200.000 florin. Tin di pensa na camaranan di siguridad na cas di miembronan caminda Lotto ta paga. Tin di pensa riba huurmento di auto pa mas cu 5 luna caminda Lotto ta paga. Tin di pensa na pagamento di companianan di IT (comunicacion) cu ta resulta despues cu ta compania di siguridad ta wordo paga pa cuida cas di miembronan di hunta di supervision. Esaki ta FRAUDE!
Un sin fin di bagamunderia a tuma luga sin cu nunca e hunta di supervision a ‘trek aan de bel’ y a pone un stop na e abusonan aki. Minister ta lamenta profundo tambe e actitud di Canadian Bank Note cu tambe ta tolera y acepta esaki!
Considerando tur e pruebanan cu minister Dangui Oduber tin den su poder sigur lo bay manda un carta pa ministerio publico. Teniendo cuenta cu e pruebanan ta contundente minister Dangui Oduber durante e encuentro a urgi tur e miembronan di hunta di supervision pa tene honor na nan mes y entrega nan retiro. Minister Dangui Oduber a bisa nan cu si denter di 1 siman esaki NO PASA e lo sa di tuma accionnan necesario. Pa gran sorpresa di minister Dangui Oduber, e la bolbe ricibi un carta for di hunta di supervision caminda nan ta informa minister Dangui Oduber cu e mester mantene su mes na un sentencia di hues caminda segun nan, e minister NO mag stroba nan di haci nan trabou. Den opinion di minister Dangui Oduber e unico strobacion cu tin ta e echo cu e minister ta denuncia bagamunderia, fiesta y corupcion den Lotto. Esaki no tin absolutamente nada di haber cu minister ta stroba nan di traha. Si nan ta considera e echo nan aki cu minister Oduber lo ta stroba nan, laga nan haci loke nan mester haci.
Ningun hende lo bay stroba minister Oduber di denuncia e cartel aki cu tin deporte secuestra pa mas cu 1 aña aki pa nan propio beneficio. Minister Oduber ta prefera di PAGA DWANGSOM cu laga e abusadonan aki sigui DESTRUI Lotto pa Deporte.
Minister Oduber lo bay presenta cada prueba y lo menciona cada un nomber di cada miembro individual pa pueblo sa kende nan ta y puntra nan kico tur nan a haci cu placa di deporte y deportistanan. Ta bon pa remarca cu tur e miembronan ta amigonan personal di
Minister Oduber ta señala cu e mesun practicanan den Lotto a sosode den Utilities, a sosode den Hospital, a sosode den gobernacion. Esaki ta un caracteristica di partido AVP.
E mensahe di minister Oduber pa e board di Lotto ta LOUD and CLEAR, minister Oduber NO ta bay sucumbi pa ningun carta di abogado y mucho menos keda sin denuncia corrupcion, fiesta y mal maneho! Minister ta convenci cu husticia lo vence denter di algun dia caminda hues lo sa di husga e hendenan aki y lo duna minister rason.