E guera entre e “Establishment” (na Hulandes: “de gevestigde orde”), hunto cu e clase elite (clase halto den sociedad) di un banda, y e pueblo na otro banda, por ser spera na Aruba tambe na aňa 2017.
E escandalo di siman: Prostitutanan bisti na politico!
(traduccion di e articulo original na Hulandes, den Solo di Pueblo di dialuna, 5/12/2016, pag. 14, parti 1).
Bo mester por ta di acuerdo cu mi, cu na tur parti di mundo – y sigur tambe aki na Aruba – politica ta un porkeria increiblemente vies y askeroso; e noticia cu Andin Bikker lo bin cu un lista di cooperacion combina cu ex-minister y ex-intregante di AVP, Otmar Oduber, tur caminda na Aruba ta wordo considera como un wega politico vies y sushi, cu un biaha mas ta demostra, y ta un prueba mas cu politiconan di awendia ta haci politica (comete politekeria) pa nan propio status y propio probecho, y cu politiconan ta santonan di cielo (schijnheiligen) grandi, y mentirosonan, kendenan no ta interesa at all den e bienestar di nos pueblo.
Andin Bikker, cueste loque cueste, mester bira minister di husticia toch? Esey ta su unico meta santo. Ay no, ta ki homber esey! Ki un homber vies, un prostituta ta keda hopi limpi banda di dje.
Cu tur su rason Nico van der Zee den Amigoe di dia 2 di December ta describi Andin como un balchi’ carni (“gehaktbal”), como un homber cu e carisma pues di un balchi’ carni. Y aki bo por añadi sin weso di lomba, y sin ningun clase di caracter.
ANDIN BIKKER, E HOMBER CU E CHARISMA DI UN BALCHI’ CARNI.
Playa (Oranjestad) a degrada te na un ciudad falso y vulgar, yen di colebra- y djacanan, y habitantenan di Aruba mester caba lihe cu nan na 2017.
Pa por salba Aruba for di e problemanan financiero, economico, politico, gubernamental, social y moral, nos mester di hendenan honesto cu idealnan di berdad, hunto cu lidernan idealista y sincero, kendenan sa kico ta bayendo robes den nos comunidad, kico ta biba bao di e poblacion, pues kico e poblacion ta pensa y ta expresa.
Y e lidernan ey no por ta politiconan, pero e biaha aki nan mester ta hendenan comun di den nos comunidad (“outsiders”), kendenan ta bay haci un limpiesa total na Aruba, mescos cu na Merca Donald Trump ta bay haci esey na Washington, of Marie le Pen na Francia, of Nigel Farage na Inglatera, Geert Wilders na Hulanda, y e partido di Pirata (Piratenpartij) na Islandia.
Tur caminda na mundo poblacionnan ta cabando cu e “establishment” politico y cu e elite, pasobra e poblacion cu hopi razon ta prefera outsiders profesional, apto y capas, riba e establishment di e elitenan politico estableci cu nan propio cartelnan di partido.
E GUERA ENTRE ESTABLISHMENT/ELITE Y E POBLACION TA BIN PA ARUBA TAMBE NA 2017
Aki mi ta pronosticabo esaki como un anuncio historico: na aña 2017 nos aki na Aruba tambe lo experiencia e guera di e pueblo comun, e clase trahador, e poblacion contra e establishment, e elite, e abusadornan politico, e cartelnan di partido, e sponsornan di partido, e privilegiadonan cu nan prensa cumpra y e “snobsnan” di partido (amo y doño di partido).
Mescos cu na Merca e poblacion bao liderasgo di Donald Trump, a exigi y gana Merca bek for di e Democrata y e Republicanonan, asina tambe e pueblo Arubano lo bay saca Aruba bek for di e cartel di partido di prome minister Eman y AVP, y Pueblo lo manda AVP, PDR y Forsa Nobo cas.
PROSTITUTANAN
Andin Bikker, Monica Kock, Marisol Lopez-Tromp, Tico Croes, Fito Croes, Harry Koeman di Cafe de Plaza, tur ta wordo menciona como esunnan cu a, ta of lo wordo nomina den posicionnan halto riba e lista di Forsa Nobo.
Si bo wak e cos aki bon ta ridiculo pa perde mas tempo cu e idea di Andin Bikker cu e lo mantene su 3000 voto, y cu Otmar Oduber na su turno lo keda cu su 4000 voto, y cu pues nan dos hunto lo logra 3 asiento, haciendo cu di e manera ey porfin e, Andin, lo por bira minister di Husticia!
E homber a studia ley, pero awor ta sali na cla cu su tino e tin den su luga di sinta, na luga di carga e tino aki den su cabes!
Fuera di su propio famia, lo no tin ningun loco cu lo bay vota pa Andin Bikker mas; ya caba henter e isla ta hariendo Andin!
Otmar Oduber ta un homber odia riba Aruba; odia door di tur empleado di hotel, odia door di comercio, specialmente door di comerciantenan den Playa, kendenan el a kibra completamente cu su parkeermeternan idiota; odia door di tur chauffeur di taxi, tur sindicato, sin lubida AHATA.
Ta 100% imposibel cu Otmar lo bay keda cu su 4000 voto di aña 2013.
Monica Kock a wordo rechasa anteriormente caba, Marisol ta politicamente morto, y si Harry Koeman ta asina estupido (lesa: bestia!) di subi lista di Otmar como un sponsor grandi di dje, esey lo bay cost’e su Cafe de Plaza, pasobra e Hulandesnan sa masha bon con grandi e aversion y e odio di Otmar ta contra cualkier Hulandes, y pues ningun Hulandes mas lo apoya Otmar.
Prostitutanan tambe ta bende nan curpa, nan curason y nan alma, pa placa y pa propio probecho, y ta parce cu esaki ta e caso tambe cu Andin, Monica, Marisol, Fito, Tico y Harry Koeman.
MEP
MEP ta completamente paralisa pa motibo di un structura di partido den cua burocracia a haci su entrada, y unda por ehempel un rancador grandi di voto manera Glenbert Croes tin net net nada di bisa.
Siman pasa ainda Glenbert a haci un anuncio fantastico, esta cu MEP en bloke lo vota contra e amienda tocante derechonan di homo, pero tristemente mesora Glenbert a wordo coregi tanto door di e lider di partido como door di conseho di partido.
MEP ta cobando su mesun graf pa motibo di su burocracia, su incapacidad pa tuma decisionnan clave, y su falta di accion y dinamismo.
E partido ta demasiado pasivo, y ta sinta cu man cruza, sperando cu na aña 2017 e exito ta bin di mes. Sinembargo exito no ta bini di mes den forma di un regalo, of manera awasero ta cay for di cielo.
Pa bo logra exito, bo mester planea y traha duro y pro-activamente.
Mi tin miedo cu na aña 2017 MEP lo paga un prijs halto pa motibo di su falta di accion.
ARUBA MERECE UN CAMBIO Y E CAMBIO TA BIN!
Mi ta cita for di Solo di Pueblo di dia 1 di December:
“E pueblo aki a sufri na man di e mal gobierno Mike Eman 1 y 2.
E pueblo su deseo ta pa bin un cambio pa Aruba.
Cu lo tin despues di September 2017 un bon gobierno.
Cu tin ministronan cualifica, cu e miho expertonan.
Y esey lo bay sosode na Aruba.
Mescos cu hendenan comun, esta e “outsidernan” Pim Fortuyn y Donald Trump a reconoce e malcontento di e pueblonan Hulandes y Mericano, asina tambe aki na Aruba un outsider, un no-politico of un partido di outsidernan, lo anuncia su mes, un grupo di hende, kendenan
– cu alma, curason y cuerpo – lo bay salba Aruba for di e desasternan di hopi aña di gobernacionnan incapas y di teror, y forma door di prostitutanan cu, disfrasa como politiconan, a kibra Aruba completamente, y cu a haci nan practicanan vies cu bista riba placa y pa propio probecho.
E ta sigui
Hugo Kalkoen