Banco Central di Aruba (BCA) recientemente a conclui e encuesta di percepcion di negoshi pa e segundo trimester di 2020. E encuesta di percepcion di negoshi ta evalua e percepcion economico y confiansa di e negoshinan local, como tambe e impacto causa pa e pandemia di COVID-19 riba condicionnan economico y actividadnan di negoshi.
E asina yama ‘Business Percetion Index’, cu ta consisti di e indicenan di condicionnan economico actual y condicionnan economico a corto plaso, a subi cu 1,8 punto di porcentahe te na 94,0 durante e segundo trimester di 2020. E ‘Business Perception Index’ total ta indica un mehoracion den e confiansa di negoshinan, desde e caida mas grandi registra den e ultimo trimester (Grafiek 1). E cambio den e confiansa di e negoshinan ta debi gran parti na mehorachion den e condicionnan economico a corto plaso, mientras cu Aruba ta move pa e normal nobo y a habri su frontera pa cu actividad turistico.
Grafiek 1: ‘Business Perception Index’
E indice di condicionnan economico actual a baha cu 1,4 punto di porcentahe te na 92,5 compara cu 93,9 den e di promer trimester di 2020. E indice di condicionnan economico a corto plaso a registra un mehoracion di 5,6 punto di porcentahe, esta for di 90,8 den e di promer trimester di 2020 te na 96,4 den e segundo trimester di 2020 (Tabel 1). Den e siguiente 12 lunanan, e percentahe di negoshinan den e encuesta cu ta premira un crecemento economico negativo a keda pa gran parti negativo (86,8 porciento).
Pa locual ta e impacto causa door di e pandemia COVID-19, BCA a amplia e encuesta di percepcion di negoshi, pa asina tambe evalua e impacto ariba benta di negoshinan, necesidad pa fondonan di emergencia y e resultado di e impacto economico.
Casi 50 porciento di e negoshinan den e encuesta (49,5 porciento) a indica cu COVID-19 a sigui impacta e benta di nan negoshi bastante, 4,2 punto di porcentahe menos compara cu 53,7 porciento den e promer trimester. Mas cu 60 porciento ta premira cu e impacto causa door di e pandemia COVID-19 lo dura mas cu 12 luna, cual ta 20 punto di porcentahe mas compara cu e promer trimester di 2020. Pa locual ta e fondo di emergencia brinda door di Gobierno di Aruba, mas cu 40 porciento di e negoshinan den e encuesta a aplica durante e di dos trimester, compara cu 32,6 porciento cu tabata tin intencion di aplica pa e fondo di emergencia durante e promer trimester.
E informe completo di e encuesta di percepcion di negoshi ta disponibel riba website di BCA (https://www.cbaruba.org/).
Tabel 1: Encuesta percepcion di negoshi (Resultado general)