Dia 7 di april ta dia Mundial di Salud. World Health Organisation (WHO) ta pone enfoke e dia aki riba nos salud mental. E tema e aña aki ta ‘Depresion: Ban papia’. Mundialmente mas cu 300 miyon hende ta biba cu depresion. Esaki ta un aumento di 18% entre aña 2005 pa 2015. Falta di sosten pa persona cu problemanan mental, conhuntamente cu miedo y stigma ta preveni hopi cu ta sufri di e condicion aki pa busca y haya ayudo necesario cu nan mester pa hiba un bida saludabel y productivo. IBiSA y tur miembro di e Plataforma Promocion di Salud ta uni nan mes na e causa aki y ta pone enfasis riba e importancia di actividad fisico pa nos salud mental y emocional.
Actividad fisico regular ta beneficioso pa nos salud fisico, esaki ta un facto! Pero actividad fisico tambe ta un manera efectivo pa mehora bo salud mental. Bo no mester ta un fanatico di deporte pa por haya e beneficionan, un cantidad modesto di actividad fisico por ta efectivo caba. No ta haci diferencia bo edad of con fit bo ta, bo por haci actividadnan na bo mesun abilidad.
Beneficio di actividad fisico pa bo salud mental
Actividad fisico ta promove diferente cambionan den e celebro, incluiendo cresemento di neurona, reduccion di inflamacion y ta promove e sensacion di trankilidad y bienestar. Dor di haci actividad fisico bo celebro ta produci endorfina, kimico potente cu ta duna bo energia y ta lagabo sinti bon. Finalmente, actividad fisico por sirbi pa distrae e mente, asina duna e celebro un ‘break’ di e cyclo di pensamentonan negativo cu ta alimenta depresividad.
Depresion: Estudionan ta demostra cu actividad fisico por yuda mehora depresion leve te modera. Banda di mehora e simptomanan di depresion, investigacionnan ta mustra cu manteniendo un schema di actividad fisico regular por preveni relapso.
Ansiedad/nerviosidad: Na momento cu bo ta sinti ansha, si ta posibel, haci actividad fisico p.e. cana den naturalesa, landa. Purba di pone atencion na e ritmo di bo rosea, con e aire ta sinti riba bo cuero. Dor di agrega e elemento aki cu nos ta yama ‘mindfulness’, dus enfoca completamente riba con bo curpa ta sinti na e momento di haci actividad fisico, no solamente bo ta mehora bo estado fisico sino tambe bo ta interumpi e fluho constante di precupacion cu ta pasa den bo cabez.
Stress: Bo a yega di pone atencion na con bo curpa ta sinti ora bo tin stress? Bo musculonan ta tenso, specialmente den bo cara, nek y schouders. Lagando bo cu dolor di nek y lomba of dolor di cabez. Bo por sinti presion den pecho, pulso fuerte of cramp den bo musculonan. Bo por tin molester di insomnia, kimamento di stoma, diarea of bo mester urina cada rato. E desconfort aki por conduci na mas stress asina ta crea un circulo vicioso entre curpa y mente. Actividad fisico ta relaha tencion y stress, eleva e energia mental y fisico y ta enfatisa e sentimentonan di bienestar dor di promove e produccion di endorfina.
Awe ta un bon dia pa reflexiona y cuminsa haci actividad fisico, bo curpa y bo mento lo gradici bo inmensamente!