E bazaar di pasco di Santa Rosa lo ofrece un cantidad di productonan fresco pa e temporada y hopi articulo local

Ministerio di Sector Primario hunto cu Santa Rosa Aruba, ta den full preparación pa asina presenta e grandioso Bazaar di Pasco, ariba Plaza Lolita, dilanti di Postkantoor na San Nicolaas, Diasabra awor, dia 7 di December di 6 PM pa 11 PM. E evento lo conta cu un total di 27 tent cu diferente productonan fresco y artesanía local. Tambe lo tin food trucks cu lo ofrece dushi platonan local, dushi bolo y otro pasa boca cu nunca falta.

Santa Rosa a ricibi tremendo sostén di diferente productonan local kendenan lo bin bende entre otro, Carni Porco fresco, Comcomber chikito, Boonchi Cunucu, Pitaya, Comcomber di salada y tambe lo tin honing fresco y varios productonan herbal y local manera productonan di Aloe, Ginger, Azeta di Coco fresco y hopi mas. Pa locual ta e parti di artesanía, cu semper ta un bunita escogencia como regalo pa Pasco, lo tin diferente artistanan local cu lo presente nan pieza nan y sin falta e artesanianan special pa pasco.
Pa esnan cu ta gusta nan productonan fresco, lo tin diferente tent cu juice fresco, liquor nan traha localmente y e bar & cushinanan lo ta bon surti cu dushi variedad di platonan tradicional y di pasco. Pa esnan cu tin yui chikito, trece nan pasobra Santa Claus lo tey pa saca potret cu tur mucha y lo tin e acostumbrado Kids Corner pa tene e muchanan bezig, mientras e mayornan ta shop y disfruta di e diferente presentacionan musical di Nico Conner, Gaita Autentico y na final nos lo celebra cu Claudius y Oreo.
E parti di e programa cu sigur tin tur hende den expectativa ta e reconocemento pa e baluartenan di pariba, tanto den e Sector di Agricultura, Criansa di Bestia y Pesca. Lo bay tin tambe mas reconocemento como Amigonan di Santa Rosa, pa asina mustra e aprecio y orguyo di tin productornan activo y positivo aportando na Aruba su Sector Primario.

Ministerio di Sector Primario conhuntamente cu henter e famia di Santa Rosa, ta spera henter Aruba pa bin pariba y bin celebra clausura di 2019 den un forma ameno y special for di 6-11 PM na Plaza Lolita.

Comments

comments