MOSCU, Rusia – Polis Ruso ta investigando e ultimo moda cu ta triunfa entre e hobennan di e pais, “e bayena blauw”; un wega caminda cu e participantenan mester supera diferente nivel, cada un mas perverso.
E wega a wordo lansa riba e web ruso Vkontakte y e pruebanan cu ta propone ta di diferente indole. E ta bay for di mira peliculanan di teror durante henter un dia, auto lesiona nan mes, grabando e simbolo di e bayena riba e cuero, incluso bula den bashinan for di halturanan grandi.
Segun The Siberian Times, e ultimo nivel di e wega, ta hiba su competidonan pa suicida y te na e momento, por lo menos 130 hoben a logra completa e reto. Lo mas preocupante ta cu Polis ta kere cu e cifra aki por aumenta ya cu e wega aki ta causando furor y a bira viral entre e poblacion adolescente.
E casonan di Yulia Konstantinova y Veronika Volkova di 15 y 16 aña respectivamente, a duna cierto luz riba e caso.
E dos hobennan aki a bula, na principio di Februari, for di un dak di un edificio di 14 piso. Konstantinova a publica un mensahe riba Instagram caminda cu por a lesa e palabra “fin”., hunto cu un potret di e bayena blauw, hecho cu a permiti realisa e prome detencionnan.
No ta prome biaha cu tin ta topa cu un caso parecido. Philip Budeikin, un hoben Ruso di 21 aña di edad, a wordo aresta pa organisa diferente grupo cu ta promove suicidio di mucha entre 2013 y 2016.
Fuente: http://www.que.es