Manchester, REINO UNI- E atacante suicida Salman Abedi, probablemente lo a ricibi entrenamento di ISIS, door di biaha pa Syria durante e lunanan prome cu e atake. Esaki segun informacion compila den e investigacion preeliminario.
Merca ta di opinion cu ISIS, door di e seccion di entrenamento aki, a prepara e scenario pa e hoben di 22 aña aki, conduci e atake mortal aki na Manchester Arena dialuna anochi. Otro miembronan di famia Abedi tambe lo a wordo radicalisa.
E desaroyo aki ta bin na momento cu Gran Bretaña a stop di comparti informacion riba e atake aki cu Merca, despues cu oficialnan Mericano a leak e informacion aki pa prensa. E hecho aki ta un di e puntonan ariba agenda di Prome Minister Theresa May pa e papia cu e presidente Mericano Donald Trump, den e proximo reunion di OTAN na Bruselas, Belgica.
Trump a hura di lo investiga, segun un comunicado di White House, bisando cu “suminstra informacion sensitivo ta un menasa grave pa cu nos siguridad nacional”.
El a dirigi su mes na lidernan, prome cu e encuentro di OTAN, Trump a rindi tributo na e victimanan di e atake, bisando cu “esaki tabata un atake barbarico y vicioso na nos civilisacion”.
Fuentenan Mericano tabata e promenan pa identifica e atacante, lantando preocupacion cerca autoridadnan cu esaki lo tin su impacto pa busca su complicenan.
Diaranson, The New York Times a pone potretnan online mustrando loke parce di ta un detonador, bateria, schroef y bolts y tambe fragmentonan di un rugtas uza den e atake. E corant, sin specifica su fuente, a bisa cu autoridadnan Britanico a duna acceso na e potret y matrialnan haya na e escena.
Fuente: www.bbc.com