Den transcurso di dos dia, e propiedadnan di timeshare na Aruba, miembronan di ATSA, cual ta e Aruba Timeshare Association, a habri nan portanan pa informa y educa studiantenan di EPB riba e industria di hotel riba e isla.
E studiantenan, kendenan a yega di e scol cu bus, a wordo ricibi na e resort pa un miembro di gerencia, a bishita tur e departamentonan, y a ricibi un bista general di e actividadnan diario cu ta rekeri pa duna servicio na huespednan y yuda hiba pa dilanti Aruba su industria di hospitalidad exitoso.
“Nos ta mira e bishita aki como crucial,” tabata e splicacion di Presidente di ATSA, hotelero Andy Osborne, “como studiantenan di scol secundario cu lo conoce nan dunadornan di trabou potencial pa e prome biaha, nos ta purba di motiva nan pa forma parti di e industria y ta apasiona pa haci loke nos ta haci.”
E studiantenan y nan mentornan a bin di ambos scol di EPB, esta EPB Hato y EPB San Nicolas, y nan a raporta cu nan a disfruta di e bishita y e co’i bebe na final di e mainta.
Esaki ta e di dos aña consecutivo cu ATSA a organisa un dia di orientacion pa e studiantenan di educacion profesional basico.
Entre e resortnan cu a participa e anja aki, La Cabana Beach Resort & Spa, Amsterdam Manor, La Quinta, Costa Linda Beach Resort, Divi Resorts, Casa del Mar Beach Resort, Playa Linda Beach Resort, Tropicana Resort & Casino, Caribbean Palm Village Resort, y Paradise Beach Village.
Aki por mira algun momento di e dia tan disfruta!