ANKARA, Turkia – Den un patri di mundo, caminda cu prisoneronan di siguridad di estado ta un secreto di estado, Turkia a bin ta contando e figuranan di dies di miles di solda, polis, hues, fiscal, academico y otro personanan deteni, despues di e intento di golpi di estado di dia 15 di Juli. For di filtracion pa periodistanan local y boletinnan ocasional door di Gobierno, e estadistanan di mas cerca pa e cantidad total di presonan turco – incluso pa un paar di siman – awor a bira un gran (y sorprendente) total di 70.756.
Cualkier estado Arabe lo aresta un ciudadano cu simplemente a pronuncia e cifranan aki – pero e revelacionnan aki awo ta parti di e guera di propaganda di e Gobierno di Turikia. Bo no sa nada ainda, sin embargo, autoridad ta bisando su hendenan – djis mira e cifranan. E asunto ta mas grandi cu loke bo ta kere! Sea cu e publico ta kere esaki, nan mester sigur sa cu e arestonan lo continua.
E figura mas yamativo ta mustra con profundo e gobierno di e Presidente Recep Tayyip Erdogan a golpia na e curason di e militarnan, supuestamente e guardian di e Estado Turco desde cu Mustafa Kamal Ataturk a funda e nacion despues di Prome Guera Mundial. E numbernan ta mustra cu e asombroso cantidad di 7028 miembro di e forsanan arma Turco, awo a wordo deteni. Esaki ta inclui 164 general y admiral, 287 coronel, 222 teniente coronel, 351 mayor, 471 capitan y 1091 teniente. Y esaki corda bon, ta e ehercito di mas grandi den NATO.
Di e “Pober Infanteria”, manera cu e tabata conoci den ehercito Britanico – cu nunca a sufri un aresto riba e escala aki den henter su historia – cifranan reuni pa e periodista Turco, Fevzi, Cakis, ta sugeri cu 1161 suboficial a wordo aresta, hunto cu 1400 sargento, 619 studiante di scol militar y 528 recluta. Ademas di esaki, 194 hues y fiscalnan militar a wordo encarcela. Sin embargo, e poder hudicial civil a sufri casi mes hopi como esunnan militar.
E arestonan aki a inclui 2385 hues, dos di nan miembro di e Corte Supremo Turco, 108 miembro di Corte Supremo, 48 for di alto corte administrativo y cinco di Corte Superior di hues y fiscalnan publico. Por lo menos 200 di e resto ta huesnan comun y fiscalnan publico. Entre dignatarionan local, 19 gobernador a wordo aresta, 76 gobernador diputado y 59 gobernador municipal. E cifranan ta mustra cu seis alcalde y dos alcalde diputado a wordo deteni. Tambe tres lider di e Asociacion di Abogadonan Turco y 245 abogado. Si bo pensa cu esaki ta basta hopi, tira un bista di loke a pasa cu polis.
Por lo menos 7000 a wordo aresta, incluyendo 629 director di siguridad estatal, 47 directornan asistente di polis – efectivamente polis di operativonan di inteligencia, como tambe 361 oficialnan en hefe di polis, 649 superintendente, 1110 super intendente suplente y 4220 agente policial ordinario. E cifranan aki por ta considerablemente halto despues di 800 mas pero arestonan inspecifica den e ultimo 48 ora. E website di gobierno ta mandando cifranan di detencion na periodistanan local tur mainta, pero ta casi imposibel pa mantene e cantidad di e cifra general.
Mientras cu e temperatura di siguridad ta bin ta aumentando of bahando den e estado di emergencia Turco di 90 dia, siguramente no lo duda pa mira cu e cifranan aki di detencion ta aumenta of cay. Ningun cifra di periodistanan aresta a wordo divulga. Pero den e dianan aki, probablemente ta mas sigur pa ta un chauffeur di bus of un hacido di limpi di caya pa ta un miembro di e elite Turco. A menos cu por supuesto, bo ta un fiel siguido di e Presidente actual di Turkia.
Fuente: The Independent (http://www.independent.co.uk/)