Sr. Greg Peterson di Aruba Birdlife Conservation ta splica cu e parti di e 16 areanan cu mester ta bou proteccion cu supuestamente a bira 19 ta un number ficticio. E mesun 16 areanan aki a wordo parti den mas pidanan y asina mustra cu el a bira 19. E ta mustra cu no a añadi nada na e areanan aki, sino mas bien nan a kita un par di pida. Un di nan ta The Mill Resort unda tin e wetlands, caminda nan a kita un pida pa bay traha un hotel.
Na 2012, Aruba Birdlife Conservation a pusha den Parlamento pa bay proteha e 16 areanan aki, pasobra tabata perdiendo hopi naturalesa. Na Februari 6 di 2013, Parlamento a vota unanimamente pa tur 16 di areanan aki bay bou proteccion di Parke Nacional Arikok. Te hasta esaki ta ser cuestiona pa e propio mandatarionan si e ta bay en berdad pa Parke of otro stichting, cual sr. Peterson ta haya ta weganan politico cu ta haci e proceso aki ta wordo stroba. E Minister concerni a mustra varios biaha cu e 16 areanan lo bira parti di Parke, pero esaki, segun sr. Peterson, ta falso. E ta splica cu tin un proceso unda e documentonan tin cu pasa cierto camindanan pa wordo trata. Un di nan ta Raad van Advies, caminda nan a mustra cu nunca nan a ricibi ningun documento.
Sr. Peterson tambe a mustra cu e Departamento di Naturalesa y Medio Ambiente ta responsabel pa yuda preveni dañonan den nos naturalesa. E ta duna ehempel di e rock-stacking cu a cuminsa tuma lugar atrobe patras di Lighthouse, caminda un compania nobo a stack tur e piedranan riba otro cual, segun sr. Peterson, Departamento di Naturalesa y Medio Ambiente mester a para hopi tempo caba. Gobierno tin cu regula cu esaki no por sosode. E Departamento mester bin cu tur e reglanan necesario pa para esaki. E Sector Turistico tambe mester adapta na esaki pa proteccion di nos isla. E ta sinti cu e Minister encarga y e Departamento a laga hopi di desea pa cu e situacion aki cu, segun sr. Peterson, a bay for di man.
Sr. Peterson ta sigura cu e demas fundacionnan tambe ta mustra nan sosten pa cu esaki. E ta splica cu un di e problemanan na Aruba ta cu tin presion negativo pa esnan cu papia of sali padilanti cu e tema aki. E ta mustra cu mester yega na cierto nivel di no tin miedo mas pa papia y pa hende para pa nan derecho di expresa.Ca