MANILA, Filipina- Presidente Filipino Rodrigo Duterte, a anuncia e ampliacion di un lista di funcionarionan di e pais cualnan el a acusa di ta relaciona cu e trafico di droga, segun e corant Filipino Manila Bulletin.
“Incluso si nan tin 100 of 200 homber arma, esey lo no yudanan”, Duterte a adverti e coruptonan. “Den kico e lucha lo yuda boso? Mi tin diesdos avion FA- 50. Mi lo manda cinco bom ariba boso. Mi lo uza e berdadero forsa di gobierno”, Duterte a declara.
Duterte a menasa di sigui su ofensiva contra di politiconan corupto despues di e reciente operacion anti- droga efectua door di polis Filipino, den e ciudad Ozamis, caminda diescinco persona a perde nan bida, entre nan e alcalde Reynaldo Parojinog Sr, cu tabata figura ariba e lista di Duterte. Parojinog tabata nenga e acusasionnan di narcotrafico. E ta e di tres alcalde di e pais cu tabata figura ariba e lista cu ta wordo mata door di polis.
Dia 7 di Augustus 2016, Duterte a publica e nombernan di 159 hues, politico, polis y militarnan cu e ta acusa di tin relacion cu narcotrafico.
E mandatario a duna ordo pa candela e permisonan di arma y permiso di polis y militarnan menciona ariba e lista y el a urgi e agente y soldatnan asigna pa proteccion di e acusadonan pa bandona nan puesto y bolbe bek na nan unidad.
Fuente: https://actualidad.rt.com/