E federacion di esgrima Arubano, SABA lo organisa nan competencia internacional di esgrima bou nomber di Dutch Caribbean Fencing Championship 2017. Tabata dos aña pasa cu e federacion di esgrima SABA a organisa e campeonato aki pa ultimo biaha. For di nos hermana isla di Corsow lo bini un delegacion pa e competencia menciona. E competencia lo dura dos dia esta 6 y 7 di oktober den e categorianan di degen y floret mientras e lo tuma lugar den Centro Deportivo Betico Croes na Sta Cruz.
Den e ultimo añanan e deporte di esgrima, cual ta un deporte Olimpico a bira masha popular na Aruba mirando e miembro di e 4 clubnan di esgrima. Principalmente nos hobennan a cuminsa mustra interes den e deporte di spada. Algun aña atras nos atletanan di esgrima a cuminsa na competi riba plataforma internacional den nos region cual ta un muestra cu e disciplina, dedicacion y boluntad pa logra lo maximo t’ey.
Na banda di e Dutch Caribbean Fencing Championship 2017, e federacion di esgrima lo organisa un workshop di esgrima duna pa e experto mr. Sarkis Assadorian cu lo ofrece esaki durante di e campeonato internacional aki. E workshop aki ta pa tur cu kier amplia nan conocimento den e deporte di arte martial aki como tambe mehora nan tecnica den e deporte di esgrima. E tayer lo wordo duna den e accomodacion di IBISA San Nicolaas. E maestro den esgrima lo permanece pa 1 siman na Aruba. Clubnan di esgrima Universal Fencing Club, Scherm Club Brazil, Centro Deportivo Playa y Don Bosco Knights/Beau-Gest lo participa na e tayer aki.
Un danki sigur na Lotto, e Loteria di Aruba pa medio di Comision di Subsidio cu a subsidia e competencia di Dutch Caribbean Fencing Championship 2017 den esgrima y e workshop di esgrima duna pa e experto internacional, mr. Sarkis Assadorian.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.