Na ocasion di e recepcion na honor di S.A.R. Rey Willem Alexander, S.E. Sr. Alfonso Boekhoudt, gobernador di Aruba a repasa e aña anterior, caminda cu el a enfatisa ariba e yudansa duna na islanan ariba, Saba, St. Maarten y St. Eustatius, despues di e pasada di horcan Irma.
Discurso di S.E. Gobernador di Aruba, Sr. J.A. Boekhoudt
Prome cu mi sigui, permiti mi djis un rato, pa duna un saludo hopi caluroso na algun persona special cu ta presente entre boso! Ta trata aki di un grupo di persona masha particular y cu durante hopi aña a duna di nan mes na un forma hopi ehemplar. Mi kier a dirigi algun palabra for di profundo di mi curason, na tur e personanan kendenan a ricibi un condecoracion real awe, den nomber di Su Mahestad nos Rey.
Cordial bon bini na condecoradonan
Condecoradonan, cordial bonbini un biaha mas! Awe boso a ricibi for di mi un condecoracion bon mereci. Un condecoracion pa boso aporte, cu boso a bin ta brinda na comunidad di Aruba, durante añanan largo y sin beneficio propio. Hendenan manera boso, ta forma e weso di lomba di nos sociedad. Cada un di boso ta representa pilarnan di e sistema social di nos isla, pa cua nos comunidad por ta masha orguyoso di dje.
Dama- y cabayeronan, ta esakinan ta e personanan, kendenan – durante nan tempo liber – a aporta, y ta sigui aporta, pa promove nos enseñansa, asisti den iglesia, yuda nos grandinan of pa mantene nos muchanan y nos hobennan riba e bon caminda.
Na diferente forma, na varios ocasion, fielmente, y sin busca interes propio, nan ta aporta via trabou boluntario na nos cultura na formacion di nos comunidad; y di tal forma tambe ta fortalece nos Reino.
Respetabel invitadonan, gustosamente mi ta pidi boso pa duna tur nos condecoradonan un aplauso bon mereci, como muestra di gratitud pa tur loke nan a haci, y ta haci, pa Aruba, pa su habitantenan y pa Reino Hulandes.
[Forsa Reino y Aruba]
Awe nos ta celebra hacimento di e di 51 aña di nos Rey. Un hacimento di aña ta un momento di fiesta y di refleccion. E ta un echo importante, cu nos gusta celebra dor di bini hunto y recorda e cosnan placentero, agradabel, bon y dushi cu nos como famia, amigo y conocirnan a pasa aden durante e añanan anterior. Asina nos ta gusta celebra tambe den nos famia mas grandi di Reino Hulandes.
Si mi mira atras riba e aña cu a pasa, mi ta sinti mi orguyoso pa e forma con nos, kendenan ta biba na Aruba, a extende nos man di yudansa na nos famianan di Reino na Sint Maarten, Sint Eustatius y Saba, despues di pasamento di horcan Irma.
Aya tambe nos boluntarionan y nos departamentonan a duna nan aporte, durante circunstancianan dificil y tin biaha hopi peligroso. Pero tambe den nos propio cas, aki na Aruba mes, nos a sa di bin hunto – na diferente ocasion – pa yuda otronan cu ta den necesidad.
Loke nos por recorda tambe cu gratitud, ta e echo cu nos tabatin eleccion, cua a bay den forma habri, honesto y relativamente trankil. E resultado nos tur por a wak. Un gobierno di coalicion cu na comienzo caba ta enfrenta retonan grandi, e.o. riba tereno financiero y social.
Mi ta contento di mira cu nan ta trahando duro riba hopi otro tereno tambe. Pasobra no necesariamente e problema mas visto ta esun mas grandi.
Mi ta confia y spera cu no unicamente nos na Aruba ta mira e retonan aki, pero cu tambe denter di Reino nan ta wordo mira. Pasobra Aruba merece e oportunidad, pa a base di un compromiso serio, haya e espacio pa traha exitosamente riba un futuro duradero y solido.
Nos, mas cu tur otro, conoce e limitacionnan cu nos isla tin pa motibo di tamaño di escala. Naturalmente yudansa y sosten ta bonbini denter di Reino. No pa impone reglanan den forma unilateral, pero for di e boluntad pa apoya otro!
Mi ta sinti mi orguyoso di e diversidad cu nos conoce den nos comunidad – cu mas di 93 nacionalidad – cu ta biba pacificamente cu otro y ta aspira na progreso di nos pais. Mi ta satisfecho pa e forma con nos ta duna bonbini na nos turistanan y haci nan estadia placentero. Nos autenticidad ta sinta tambe den nos propio idioma y con cariñosamente nos ta acepta e Arubianonan nobo den nos sociedad. Mi ta kere cu nos por ta un ehempel pa otro paisnan.
Nos reto pa e añanan nos dilanti ta pa sigui busca e coneccion cu tur grupo den nos sociedad. Ningun grupo mester keda marginalisa, segrega of exclui pa motibo cu nan ta diferente. Nos mester crea condicionnan esencial pa esey. Cu legislacion, cu transparencia y cu proceder gobernamental integro. Pero pa un comunidad duradero, inclusive y social, tin mester di mas ainda.
Gobierno no por haci esaki su so. Esaki ta exigi scogencianan propio, e disposicion di tur hende pa contribui na un Aruba miho y mas bunita, sin cu esaki ta un obligacion.
Mi ta spera cu nos tur, cada ken for di nan experiencia y expertisio, por contribui na enrikecemento di nos sociedad Arubano; na nos famia Arubano. Un contribucion activo como ciudadano, como prohimo, pero por ehempel tambe como boluntario na un di e cantidad grandi di organisacionnan boluntario, manera clubnan deportivo, clubnan di servicio of otronan cu un bon meta.
Na Aruba tin afortunadamente hopi hende cu ta haci esaki caba. E condecoracionnan Real di awe ta haci esaki claramente visibel. Pero tambe e “Zilveren Anjer” cu prinses Beatrix lo entrega na Alice van Romondt, pa su aporte incansabel na nos cultura, nos literatura y nos arte na Aruba. Alice ta e di tres Arubiano den historia kende ta ricibi e “Zilveren Anjer” aki. Prome cu ne tabata Padú Lampe na 1985 y sr. J.H. Beaujon na 1958, cu a ricibi e reconocimento aki. Alice, for di awo caba, masha masha pabien y danki di curazon pa ken bo ta!
Pero tambe durante ultimo lunanan mi por a cera conoci cu iniciativanan cu conscientemente ta traha na un comunidad inclusive. Ta trata di initiativanan manerea Adopt an Addict, Hands-4-Addicts, Trampolin pa Trabou, “Sea bunita, sea bo mes” y otro bon ehempelnan.
Iniciativanan pa cua boluntarionan ta drentra den accion pa yuda hendenan vulnerabel na Aruba y di tal manera ta contribui concretamente na un comunidad inclusive y duradero. Por ehempel pa medio di duna sosten na muchanan cu limitacion fisico y na adultonan, cu participacion digno den nos sociedad, na trabou, na scol, pero tambe directamente den nos ambiente di biba.
Dama- y cabayeronan, laga e bon ehempel cu nos tin rond di nos inspira nos pa sigui den nan pasonan – pa nos tambe pone den practica e stimacion cu nos tin pa nos prohimo y pa nos isla. E ora nos no ta ‘biba’ so na Aruba, sino ta convivi cu otronan na Aruba!
[Aruba duradero]
Convivi ta e lazo cu ta uni nos como un famia Arubano, pero tambe ta uni nos como un famia grandi den nos Reino. E ora nos por ta sigur di un Reino duradero.
Un Aruba duradero ta pa mi un Aruba, den cua cada Arubiano tin e espacio pa desaroya su mes – teniendo cuenta cu e reglanan cu ta conta pa nos tur. Un Aruba den cua tur hende tin oportunidad- y derechonan igual, tal manera esaki ta stipula den nos leynan.
Un Aruba duradero ta un Aruba, unda ta respeta derechonan fundamental, unda ta cumpli cu nan y unda ta mantene nan. Y unda esnan cu no ta mantene nan mes na di ley, via di nos Ministerio Publico y un hurisdiccion independiente, ta wordo coregi. Un Aruba unda nos ta prepara nos hobennan pa un futuro duradero, ofreciendo nan bon educacion, seguridad riba caya, na scol y na cas.
Pa nos por construi un Aruba duradero tambe ta rekeri pa haci scogencianan inteligente. Scogencianan tocante un balansa entre economia y naturalesa. Un balansa entre entrada- y gastonan. Tocante traha of no traha den e espacionan scars cu nos tin ainda riba nos isla chikito y cu ya caba ta hopi pobla. Ta importante pa haci scogencianan, cuanan na fin di cuenta ta bon pa nos y pa nos generacionnan cu ta sigui nos, pa nos yiunan y pa nos nietonan.
P’esey laga nos trata e tesoronan natural cu nos a haya for di nos Creador y nos antepasadonan cu hopi cautela. Afortunadamente ainda a sobra naturalesa na Aruba y mester traha pa proteha areanan cu ta bou di presion pisa, manera Isla di Oro. Ainda aña pasa, durante e traspaso formal di Spaans Lagoen na Parke Arikok, Prinses Beatrix a visibilisa su compromiso pa cu naturalesa di Aruba y hunto cu ne, e bienestar Arubano.
Durabilidad ta conservacion tambe di e parti autentico di nos Aruba stima. Hunto – y den balansa – nos mester keda drecha e cosnan cu por haci miho den nos comunidad. E forsa di nos famia, e vigor di nos Reino, hustamente ta e union den variedad.
Diversidad den descendencia y den pensamento, ta percura pa enrikecemento y inovacion. Y sin inovacion nos lo no por enfrenta e retonan ni e oportunidadnan di un mundo cu ta cambiando asina lihe. Pesey, laga nos sostene e cambionan cu un comunidad duradero y inovativo ta exigi.
Dama- y cabayeronan, permiti mi clausura mi discurso. A bira tempo pa bai den un setting menos formal y celebra na honor di nos Rey. Laga nos tuma tempo pa combersa cu otro y pa pasa un momento ameno cu otro.
Cu gusto mi ta pidi boso, prome cu mi baha for di e podium aki y lague den man di Robert Jeandor y su Solo Banda Show, pa boso tur hisa boso glas y brinda hunto cu mi pa e di 51 aña di nos Rey Willem Alexander.
Biba nos Rey! Biba nos Rey! Biba nos Rey!