Despues cu siman pasa Ministerio di Desaroyo Teritorial, Infrastructura y Medio Ambiente a tuma nota di un denuncia publico haci pa un ciudadano cu fam Morales, cu lo ta indica cu tin actonan iregular cu su persona lo a encontra su mes aden cu un otro ciudadano di fam Corona, Minister a instrui, inmediatamente, director di DIP pa haci un investigacion interno ariba dicho declaracionnan.
https://www.facebook.com/GabineteWeverCroes/videos/372864630075255/
E siman aki a sali publica un otro denuncia publico di un ciudadano di fam Rodriguez contra e mesun persona anteriormente identifica cu fam Corona. Pa e motibo aki, Minister diamars atardi a instrui director di DIP pa no solamente haci un investigacion interno mas profundo na DIP, pero tambe a instrui e director di DIP pa entrega un keho formal na Ministerio Publico pa posibel soborno y/of estafa den cual un of otro di e personan ariba menciona lo por ta envolvi. Banda di esaki a laga prohibi entrada di dicho personanan, na edificionan di DIP, te ora cu e investigacion termina.
Ministerio ta bolbe enfatisa cu ningun di e personanan envolvi den e acusacionnan aki ta traha pa gobierno y no tin ningun vinculo di trabou tampoco cu nan. Por lo tanto Ministerio ta distancia su mes totalmente di dicho acusacionnan y ta tuma e pasonan necesario pa subraya e integridad di e departamento di DIP.