Den un conferencia di prensa realisa na Embassy Suites, Anthony Rojer, director di Utilities, a presenta e resultadonan di un estudio efectua p’e empresa consultor MPR Associates, pa atende e problemanan di e interupcionnan di coriente cu ta afectando e isla. Den e evento aki tambe a participa e representantenan di NV Elmar y MPR Associates.
Rojer a splica cu e obhetivo principal di e conferencia aki tabata pa expone e hallazgonan y e recomendacionnan di MPR Associates, encuanto e interupcionan electrico cu Aruba a experencia recientemente. “Nos obhetivo semper tabata mantene un suministro di coriente confiabel. Ta p’esey nos a dicidi pa efectua un investigacion detaya pa comprone e causanan di e interupcionnan aki miho,” el a indica.
Brian Cunnar, miembro di MPR Associates, a presenta e ekipo di experto cu a colabora den e estudio, destacando e competencianan di Catherine Inge, den resiliencia energetico, Spencer Paul den diseño y prueba di transformador di potencia y Frank del Campo den ingenieria electrico y diseño di hardware.
Catherine Inge a detaya e agenda di e investigacion, den cual a enfoca riba dos area principal: analisa e causanan di e interupcionnan di 2024 y evalua e plan di mantencion di tres aña, implementa pa Elmar. “Nos estudio a revela cu e interupcionnan a wordo causa tanto pa factor externo como pa problema di confiabilidad di ekipo,” Inge a señala. Un dato curioso cu el a destaca tabata e aumento di interupcion causa pa blaas y fli den 2024.
Spencer Paul a enfatisa cu Elmar ya ta tumando medida pa enfrenta e retonan aki mediante e creacion di un Oficina di Maneho di Proyecto (PMO), cu tin como obhetivo coordina y facilita e iniciativanan di mantencion. “Nos ta kere firmemente den e efectividad di e PMO aki, pa impulsa e exito di e plan di mantencion,” Paul a afirma.
Frank del Campo a recomenda centralisa e datonan di mantencion riba un base di dato di maneho di activo, loke lo permiti genera informe y realisa e ahustenan necesario den e programa di mantencion. “Ta crucial tin un base di dato bon manteni pa por dirigi corectamente e esfuersonan y mehora continuamente e programa di mantencion,” Del Campo a splica.
Cunnar a conclui e presentacion subrayando e importancia di siña di e datonan di mantencion y di sigui mehora e actividadnan di mantencion preventivo. “Elmar tin e gravedad di e problemanan y ta comprometi cu e implementacion di un programa di mantencion sostenibel y efectivo cu ta sigura un suministro electrico confiabel pa tur,” el a afirma.
E evento a laga cla cu, aunke e solkucion di e problemanan di confiabilidad no lo ta inmediato, e medidanan adopta pa Elmar y e recomendacionnan di MPR Associates, ta encamina na mehora significativamente e suministro electrico na Aruba.
