Happiness 360 Conference a wordo inaugura, cu participacion di prome minister Mike Eman, minister di Turismo Otmar Oduber, ATA-CEO Ronella Tjin Asjoe-Croes y Taleb Rifai, presidente di United Nations World Tourism Organization (UNWTO). Tambe tabatin un discurso di Dr. Robert Waldinger, director di Harvard Study of Adult Development y un panel tocante felicidad modera pa Arnaud Collery, Chief Happiness Officer. Orador invita Dr. Robert Waldinger, Director di Hardvard ‘Study of Adult Development’, cu a conduci un di e estudionan riba desaroyo di felicidad di mas largo den historia cientifico cu a relata cu ‘biahe y turismo’ ta conduci na felicidad, duradero.
Fuera di esey a trata e ultimo tendencianan den mundo di turismo entre otro Sharing Economy, cu ta un di e temanan clave di Happiness 360 Conference. Den turismo e fenomeno aki ta manifesta su mes entre otro den e oferta di cas y apartamentonan directamente di e propietarionan na e turistanan, por ehempel via Airbnb cu por cierto tambe ta wordo representa durante e conferencia. Akinan April Rinne, e experto renombra ariba e topico a duna un splicacion kico Sharing Economy ta encera. Despues di e presentacion aki a tuma lugar un panel riba Sharing Economy cual a wordo modera pa e rector di Universidad di Aruba, Glenn Thodé den presencia di entre otro Shawn Sullivan di Airbnb.
Durante e prome dia di e evento internacional aki diferente grato noticia a wordo anuncia, incluyendo cu Aruba ta e pais mas felis na mundo den linea cu estudio di 5 aña cu a wordo haci bou di nos populacion.Tambe Aruba lo ta anfitrion di PAMAC 2017 (conferencia ‘Platinum members’ Florida Caribbean Cruise Association), por ultimo durante di secion cu 400 studiante di EPI y Universidad di Aruba Secretario General di UNWTO a anuncia cu lo regala 4 ‘scholarships’ na e mihor 4 studiantenan di hospitalidad.
“Por midi e exito di bo pais cu cifranan exacto manera GDP y otro datonan tangibel, pero na final di dia locual ta importante ta e cosnan intangibel manera felicidad. Esaki ta netamente locual Aruba ta haciendo y awe nos por mustra esaki na publico local y tambe na e publico y medionan internacional presente.” Ronella Tjin Asjoe-Croes ta comparti. Cu partcipacion di aproximadatemente 500 persona, Happiness 360 su prome dia por wordo considera un dia exitoso rotundona unda Aruba por luci na comunidad turistico internacional y alabes siña mas atrabes di invitado y expertonan presente. Esaki tambe por wordo sigui online via Livestreaming na facebook.com/oficinaditurismo, na unda mas 5,900 persona a sigui esaki en bibo durante e prome dia.