Tin hopi solucion pa drecha e problema di dump y keda papia no ta trece solucion segun Sr Michael Rasmijn – Manager Parkietenbos, despues di e bishita di minister Otmar Oduber.
Segun Sr. Rasmijn, e minister por wak e situacion di dump, cual ta un bon comienso pa bin na un solucion pa e situacion di dump. E minister a tuma su tempo, y a haya un splicacion di con e procesamento di sushi ta bay. E proceso actual ta mesun cos cu esun di 15 aña pasa, dus di tira santo ariba e sushi.
Tambe Sr. Rasmijn a splica e minister tocante e mashin di Bouldin & Lawson cu tin partinan cu por wordo uza, cu ta den bon estado ainda, pa evita cu e dump ta sigui bira mas grandi.
Semper Sr. Rasmijn a bisa, cu tin hopi solucion, ta sinta mester sinta na mesa y pone tur banda di otro y wak cual ta cumbini Aruba. Hopi biaha un solucion cu tin pa esun di Aruba, no ta mescos cu esun di Hulanda of Merca. Door cu Aruba ta chikito, e mester ta algo practico y pagabel.
Manager di Parkietenbos a sigui bisa, cu semper e tabata den contacto cu e coordinador di e minister saliente, pa por bin na un solucion, pero te ainda e solucion no a yega.