Awe dump ta gratis y keto bay por wak cu Aruba no ta mas limpi. A acerca Serlimar pa haya sa kico nan tin pensa di haci pa cu e tema di sushi rond di Aruba. Vocero di Serlimar, Sr. Lionel Croes a amplia mas ariba esaki.
Den pasado tabata tin e fenomeno, caminda cu gobierno tabata cobra 10 florin na dump, pa e servicio di PTS. Esaki a keda cancela, pero ainda no a mira un mehoransa ariba esaki. Ta cuestion di flohera, pa no bay te dump tira e sushi. Tir’e den un mondi banda di cas mes, y habitantenan ta tira nan desperdicio patras di nan cas mes. Nan sa cu e otro habitantenan ta entrega keho y Serlimar ta bin haci limpi toch. E tin di haber cu e comportacion di e individuo mes.
Na Parkietenbos, algo mester wordo haci. Sr. Croes ta convenci, cu no mester depende solamente di gobierno, pero mester tin un plataforma trahando conhuntamente cu e pueblo. Creando incentiva pa e habitantenan, cu nan ta mira e necesidad di deshaci di tur desperdicio di un forma responsabel.
Serlimar tin plannan grandi, hopi ideanan y nan ta conta cu expertonan “in house”. Den pasado varios plan a wordo manda pa gobierno. Pero na final Serlimar ta un Suis Generis, e ta un compania estatal. Esey kiermen cu nan ta keda bou di supervision y mandato di gobierno.
Nan no sa kico lo pasa den futuro, pero nan ta optimista pa cambionan cu mester bin pronto. No un solucion a corto plaso, pero un solucion a largo plaso pa e situacion na Parkietenbos, segun Sr. Lionel Croes, vocero di Serlimar.