LONDON, Gran Britania- E Dukesa di Sussex, Meghan Markle, dialuna a duna luz na un yiu homber, segun e Palacio di Buckingham a informa. E pareha tambe a anuncia esaki ariba nan cuenta di Instagram.
Tanto e mama como e baby ta den bon estado di salud, segun publica ariba rednan social. E baby tabata pisa 3,26 kilo.
“E pareha ta gradici e miembronan di e publico pa comparti nan emocion y pa nan apoyo na un momento asina special den nan bida”, e anuncio ta bisa.
Meghan a haya dolornan di parto “den oranan trempan” di dialuna, segun un comunicado di Palacio di Buckingham.
Prins Harry tabata cu su casa. E mama di Meghan, Doria Ragland, ta hunto cu e pareha den nan residencia.
E baby ta di shete di e liña di sucesion na e trono di Reino Uni, despues di Prins of Wales, Prins Charles, Duke di Cambridge (William) y nan yiunan, prins George, prinses Charlotte y prins Louis, y Duke di Sussex.
Esaki ta bira e di ocho bisnieto di Reina Isabel II.
Harry, kende a haci e anuncio personalmente, a sigura di ta “absolutamente emociona” y gradicido pa e apoyo ricibi durante e embaraso. Segun el a bisa, ainda nan no tin nomber pa e baby.
Ambos a splica cu nan tabata kier privacidad durante e yegada di nan yiu y cu nan lo anuncia esaki unabes cu a informa e famia. E mucha a nace pa 5 or y 26 di mainta ora di Inglatera, pero tabata te cu casi 3 or di atardi cu e noticia a wordo haci publico.