DUBAI – E plannan pa un metropolis den expansion a wordo desvela na Dubai. E mega centro comercial lo bira e espacio di “leasable retail” mas grandi di mundo cu un grandura di 100 campo di futbol.
Conoci como Dubai Square, e proyecto di 2 mil miyon dollar den e Dubai Creek Harbour Development lo conta cu mas di 8 miyon pia cuadra di espacio comercial, cual ta dobel e gandura di e Dubai Mall y tambe lo contene e Chinatown mas grandi di e Medio Oriente. Diseña como un destino absoluto, e piso abou lo brinda presentacionnan di famosonan, conciertonan y espectaculonan teatral den un escenario di entretenimiento futurista cu proyeccion 3D y zonido cu iluminacion teatral. Famianan lo wordo sirbi cu un cine, parkenan acuatico, stadium deportivo y supermercado. Pero ta e angulo di tecnologia ta loke ta duna mas intriga. E ta inclui experiencianan manera vestuarionan VIP, fitting rooms cu spielnan interactivo y coleccionnan priva di moda. E estilo “omnicanal” di e espacio comercial, cu ta conecta e tiendanan fisico cu plataformanan digital, lo wordo eleva dor di e tecnologia nobo cu compras realisa por medio di mobile of desktop. E experiencia di compras aki lo wordo aumenta dor di custom-designed mobile applications, barcode scanning applications y radio-frequency identification.
Cu tecnologia inovador den e plannan, e desaroyadornan ta prepara p’e futuro experiencia di e centro comercial dor di primordialisa millennials? Emaar Properties, cu ta desaroyando e Dubai Creek Harbour hunto cu Dubai Holding, ta mustra cu tin algo pa tur persona den e Dubai Square, pero alabes ta reconoce cu e generacion nobo di hobennan sabio den tecnologia ta un cliente primordial.