Ta hopi di lamenta cu mester bay den accion y ta hopi mas di lamenta cu ora director di Aduana mester a manda un carta pa stop e proyecto na Airport no a haci nada segun Sr. Eduard Maduro, di sindicato di Aduana, SADA ta splica.
Tin hopi cosnan ta sosode na Airport, den e proyecto di construccion, caminda cu duaneronan no ta hayando claridad y nan a bisa ta basta. Nan ta haya cu nan aporte, den e caso di e werkvloer no ta wordo tuma den consideracion. Den nan opinion, e director ta laga Triple A haci cambionan, sin tene cuenta cu su coleganan cu ta traha na Airport y esaki tabata motibo suficiente pa pone trabao abao. Coleganan di otro seccion, tambe a bin apoya e coleganan den accion ya cu nan ta un solo Cuerpo di Aduana.
Presidente di Sindicato di Aduana, Sr. Eduard Maduro a bisa cu nan tabata tin un reunion cu Triple A, pero no a sali nada concreto for di e reunion aki. Siguiente paso di sindicato ta cu nan lo manda un carta pa minister y lo pidi un reunion tambe cu Minister, tocante e asunto aki. E asunto di construccion ta algo cu Duana tin basta tempo ta preocupa cun’e.
Durante un reunion na 2016, Sr. Fasdio a trece dilanti, cu si Management di Duana manda un carta pa stop e proyecto di construccion, Triple A lo haci esaki. Esaki ta pa motibo cu nan lo no kier traha cu un cuerpo cu ta malcontento, locual cu ta pasando aworaki. Pero lastimamente, leiding di Duana no a tuma e stap ey y a duna consentimento pa sigui cu e construccion. Duana a cuminsa vocifera nan malcontento, ya cu di un dia pa otro a cuminsa construi.
Sr. Maduro a splica cu nan a sinta na mesa pero no tabata tin un claridad di precisamente di ki dia e construccion mes lo cuminsa. Ora cu esaki a cuminsa, a bati na porta di tanto Director como Minister. Sindicato a purba di tur manera di evita accion, y yega na otro na mesa pa asina trece un solucion, cu tur hende lo ta di acuerdo cun’e. Un plan, un bouwtekening , caminda tur ta di acuerdo. Pero esey no a sosode.
E director di Duana a cuminsa presiona e comision institui door di Minister na 2014, ta bin cu input. pa duna aprobacion achteraf, y esey no a sosode. Na mesa a sinta y a trece algun punto di preocupacion di Duaneronan dilanti. Pero nan ta sinti cu ni e puntonan trece padilanti no a wordo tuma den consideracion y esaki a pone cu nan a pone trabao un banda.