Proximo luna Aruba ta cuminsa ricibi su prome barconan crucero bek. Pa esaki tin hopi trabou andando. Pero prome cu por bay den operacion, tur compania, mester ta cla pa por atende cu turistanan. Asina operadornan di tour mester tin nan vehiculo y personal cu tur permiso necesario.
Departamento di Transporte Publico ta haci un apelacion na e companianan di tour pa percura cu nan vehiculonan ta cumpli cu tur e exigencianan di ley. Ya caba DTI a pone un fecha special, riba diasabra, solamente pa atende cu e vehiculonan di companianan di tour.
Theo Kock di DTP a splica cu ya nan tabata den comunicacion cu e companianan pa informa kico ta spera di nan. No solamente nan permisonan, pero nan vehiculo y inclusive personal. Nan por a compronde cu basta vehiculo a bay pa keur caba. Esnan cu nan explotatie vergunning a caduca. Mester controla si esaki ta na ordo, pasobra e tin un validez di cinco aña.
El a recorda cu desde 2019 a bini cu e ley cu no ta permiti vehiculonan di stuur na banda drechi den transporte publico. A topa cu algun caso, di cual a duna nan un chens p’asina busca un otro vehiculo.
Aunke cu mundo y Aruba ta den e pandemia di coronavirus, DTP a mira un situacion straño na Aruba. E peticionnan pa opera den sector di turismo a aumenta, tanto pa V-Car como pa Taxi. Tin Carrental a pidi tambe pa wanta poco tempo pasobra nan no tin suficiente auto pa reinicia nan operacion. Tur esaki ta bou evaluacion di DTP. Tin un moratorium pa taxi di 500 permiso y awo den e temporada di pandemia aki no ta conoci kico ta bay haci. Ta keda na cada minister di Transporte ki momento ta amplia esaki, esta e cantidad di taxinan y permisonan O.