E tarea di inspeccion riba caya cu Departamento di Transporte Publico tin aworaki lo tuma luga den un forma mas eficiente. DTP pronto ta cuminsa traha cu sistema di cloud cu ta dunanan acceso na tur informacion actualisa di permisonan. Segun Tito Thiel cu a representa e director di DTP, a bisa cu asina aki tur informacion ta obtenibel facil y lihe y no mester yama oficina e ora mas pa informacion pa por haci control.
E software nobo pa DTP ta encera cu ta bay cualifica tur e permisonan den un sistema y ta bay focus mas riba e inspeccion riba caya. Segun sr. Thiel unda cu sea controlnan wordo haci informacion lo ta disponibel di biaha riba un tablet.
Facilitacion trabou
E tablet su funcion ta bay ta cu e personal tin e sistema cu tur e permisonan cu DTP ta atende cu ne hunto cu nan. Ora cu yega momento di control riba caya facilmente tur informacion cu tin riba e tablet ta wordo saca for di dje y di biaha por controla taxi, autobus of car rental y verifica si nan permisonan ta na ordo por ehempel, sr. Thiel a bisa
E intencion ta cu via di e software aki cu ta traha cu cloud, ta link tur informacion y hacie disponibel riba e tablet pa por saca e informacion di biaha. Esaki ta facilita e trabou pa e ora no tin nodo di uza un papel of cana cu listanan cu tur e nombernan etc. ‘Facil ta cu coriendo Patrouille bo ta bay simplemente pasa door di e rij di autonan, primi e number di taxi y e ta duna tur informacion manera si e auto ta gekeur, si number ta paga, si seguro ta na ordo, si permiso ta na ordo, ken ta e manehador e ora ey etc. Pasobra cerca taxi y autobus bo por haya segun e vergunning cu por pone un hende reemplasante pa maneha e auto temporalmente y nan ta wordo registra den e sistema pa nan ta disponibel hopi lihe. Sr. Thiel a sigui enfatisa riba e facilidad tin e sistema aki como cu ya no mester yama bureau via radio of telefon, pa pidi nan busca den sistema informacion di un taxi.
Importancia
‘E verificacion di informacionnan aki ta importante pasobra e ora bo netwerk di taxi ta bou di un bon control. Di dos, tambe ta haya sa si e persona cu ta reemplasa un taxista tin permiso pa haci esaki, si el a caduca si of no. Cu mas control e ora tambe ta bay baha e cantidad di hende cu ta core ilegal ya cu tin un sistema na ordo.
Finalmente sr. Thiel a avisa cu probablemente e siman aki ainda lo por lansa e proyecto y sino mas tarda e siman cu ta bin lo lansa e proyecto aki pa pueblo haya tur informacion den medionan di comunicacion, di con e proyecto lo desaroya den futuro.