Pa loke ta trata keurmento di auto, tin cu bisa cu e aña aki, probablemente pa fin di aña, e cantidad di vehiculo cu DTI a keur, lo ta bay ta menos cu aña pasa, mirando cu den e seccion ey, tabata tin varios problema cu e personal y tambe algun biaha cu e ekiponan tambe. No obstante esey ta haciendo tur esfuerso pa brinda un miho servicio na comunidad y tambe mirando cu den fin di aña, cu tin algun dia cu nan lo ta cera. Entre otro tin e trailernan tambe cu lo bay transporta klapchi, etc., polis tambe ta exigi pa nan ta gekeur. Te awor aki ningun no a presenta pa wordo gekeur. Pa loke ta trailernan cu lo bay den ruta di Carnaval, ta un so ta bin, cual tur aña ta bin religiosamente. Esunnan cu a presenta minimal.
Director di DTI, Dominico Werleman, a splica cu nan ta trahando straight te cu dia 29 di December. Si ta asina, pa loke ta trata e trailernan, ta bon si nan haya nan keuring e aña aki ainda, pa tuma contacto cu voertuigkeuring, cu ta encarga cu e keuringslocal, pa wak ki posibilidad ainda tin pa nan por haya un afspraak. Mirando cu e lista di e afspraak di December practicamente ta full yen, ta bon pa mas pronto posibel nan tuma contacto cu e chef di e seccion y wak con lihe por yudanan e ora.
Personal ta keda un problema, segun Werleman, pero ta zet in personal di otro seccionnan, cu tambe tin experiencia den keuring y esey lo yuda toch cumpli cu e afspraaknan cu tin pendiente.
E sistema di afspraak ta cu nan tin cu bay na DTI na Pos Chikito, tin cu paga delanta pa keuring, e ora pa nan haya e cita pa e keuring por tuma luga, segun Werleman.
DTI ta trahando pa haya ekipo nobo. E intencion ta pa den futuro pa DTI haya su propio edificio of bay den un otro edificio. E intencion ta tambe pa e mudamento ey lo bin e ekiponan nobo di keuring. Esey ta den planning. Mirando esey e ora no ta bay inverti den e localidad actual. Locual si ta bay haci probablemente na cuminsamento di aña duna e dos ekiponan cu tin, un revision pa nan ta up to date pa nan por wanta e cantidad di keuring cu tin. Te awor aki e ekiponan a duna bon resultado, aunke nan tin un tempo caba. Pa loke ta e breakdownnan tabata minimal. Tin un seccion tecnico y e empleadonan mes a specialisa nan mes den reparacion y mantencion di e ekiponan aki, cu den cualkier eventualidad cu a presenta, por a pone e ekiponan den servicio mas lihe posibel.
E intencion tambe ta pa haya un ekipo specialisa pa brommer. Esey tambe ta bay yuda e ora pa locual ta trata e checkeo di e luznan. Esey tambe ta haya hopi reclamo anochi cu tin auto cu ta blind otro. Esey tambe ta busca un aparato pa check e luznan di vehiculonan. E mehoracion cu lo bay bin probablemente pa ora lo tin e edificio nobo pa 2017.