Den e luna di Augustus cu a caba di pasa DTI a registra shete persona como Inspector di Siguridad. Ta trata di empleado di empresa di construccion y mantencion. Tambe di empresa di servicio y consulting cu lo brinda e servicio di inventarisacion y evaluacion di risiconan den un empresa.
Te awor DTI tin 23 persona reconoci como inspector di siguridad. Den luna di Augustus tambe DTI a duna varios presentacion na empresanan cu a mustra interes den cumplimento cu e Ordenansa di Seguridad atraves di un inspector di seguridad. Esaki a sosode riba peticion di e empresanan cu tabata entre otro hotelnan, companianan di construccion y empresanan administrativo (oficina).
Peticion di empresanan pa wordo reconoci pa por duna e training di inspector di siguridad tambe ta sigui drenta na DTI. DTI tin te cu awor cuatro empresa registra como competente pa duna e training di inspector di siguridad. E empresanan aki ta: Qesh Training & Consultancy, Metrosystem NV, BPO Caribbean NV y Hyrax Consultant & Risk Management Institute. Otro empresanan ta den e proceso di evaluacion.
Na oficina di DTI por haya informacion di contacto di e empresanan reconoci pa duna e training di inspector di siguridad y tambe un lista di e inspectornan di siguridad cu ta brinda nan servicio na tercera.