Director di DTI, sr. Dominico Werleman ta conta con na comienso di e evaluacion y prueba di LED, hopi tabata sceptico cu e luz aki di berdad lo funciona of con largo. Despues di a duna su conseho positivo pa Gobierno uza esaki como reemplaso di puntonan di luz existente y esnan nobo, por bisa cu siguridad cu e tecnologia a proba su mes. Esaki, segun Werleman, ta algo cu tur tecnologia mester haci.
E reto cu desaroyadonan di luznan LED a haya tabata pa logra evita pa e componentenan bira demasiado cayente den e caha cu ta contene e luz LED pa asina nan no daña na e otro partinan di e sistema. Fabricantenan a yega na un solucion y e tecnologia tabata cla pa su aplicacion. Pa loke ta trata e retonan specifico di Aruba, e director di DTI a duna di conoce cu “tanten cu e parti di LED ta bon seya cu e aire di Aruba cu tin hopi saltpeter no yega na dje, e ta funciona bon. Esey ta e parti importante.”
Esaki ta algo cu e departamento di inspeccionnan tecnico a tene hopi cuenta cu ne ora scoge e tipo di luz a bay uza riba nos isla. Werleman: “Nos a wak diferente tipo di luz na diferente fabrica; nos a evalua cua ta esun miho traha y cua ta esun di miho calidad.”
E proyecto di Luz den Bario ta consisti di 12 mil punto di luz existente y tambe nobo, rond di Aruba, cu ta bay haya awo e tecnologia LED. Cada cinco siman un total di 800 punto ta keda cla rond di Aruba. Actualmente ELMAR, DTI y representantenan di Minister di Infrastructura y BoBario di Ministerio di Asuntonan General ta trahando den e area di Noord pa sigui pa San Nicolas despues.
- Latest
