Awe ta e ultimo dia cu DTI ta habri pa e aña aki, nan lo ta cera entrante 21 di December te cu 4 di Januari. Pa e parti di afspraak, esnan cu lo bin Januari lo haya un afspraak na mita di Februari. E ultimo temponan ora cu control a cuminsa mas severo, DTI a haya hopi peticion di personanan cu ta bay eynan pa afspraak, cual a haci cu Januari ta yen caba pa cu afspraak.
Pa loke ta e situacion di afspraak cu tabata tin, cu pa medio di Covid19 mester a pospone algun etc, riba e parti ey DTI ta informa cu nan tin e tras di lomba caba y a atende cu tur hende cu tabata pendiente caba. Mester tene nan mes na protocol dus esaki ta haci si cu por atende cu menos auto pa dia, a bin cu extra cambio si pa tog purba yuda e pueblo pa por haya un keuring prome cu aña caba. Pa e ultimo luna y mey, DTI tabata tin orarionan hasta di 6’or di mainta cu un ploeg cu tabata percura pa acapara mas persona pa dia, y tambe nan tabata tin e ultimo lunanan tur diasabra disponibel pa afspraak pa keur.
“Di bandi DTI nos a haci nos maximo esfuerso pa duna e chens na tur hende pa haci un keuring, henter aña e tabata un situacion dificil pa Covid19, pero e añanan anterior esaki tabata e mesun situacion,” segun Richella Dorothal, Hoofd van Dienst Waarnemend DTI ta bisa. Awor ta para na un 18% di auto cu ta gekeurd na Aruba, y esaki ta un percentahe hopi abao. Aña pasa esaki tabata 28%, kiermen tambe aña pasa DTI a haya nan mes cu e problema aki caba.
“Nos ta purba na keda conscientisa pa nan por bin keur, pero ta keda na e persona mes riba e siguridad di su mes, su auto y esnan cu ta riba careteranan.”