Si bo yiu ta gusta musica y tambe toca instrumentonan di ritmo aki ta bo oportunidad. A combersa cu Carlos Bislip pa cu e proximo proyecto pa e aña aki cu ta e Drum Set & Percussion Camp.
Carlos a comenta cu na aña 2009 el a organisa e prome Drum Camp cu dos obhetivo. E prome tabata pa introduci na e comunidad y e hobennan di Aruba cu e mundo di Percussion ta hopi amplio anto cu ta encera varios instrumento ademas di Drum Set, Conga y Timbal.
E segundo obhetivo tabata pa demostra cu ora tuma instruccion di musica di un manera intensivo, esta 3 ora pa dia 5 pa siman pa 4 siman e participantenan lo siña masha hopi mes.
Carlos a comparti cu nos cu ademas di a logra e dos metanan aki, tabata tin varios otro factor cu a bin na superficie cu ta di balor agrega na e crecemento di e participantenan.
Carlos a ripara cu e muchanan a siña “Problem Solving Skill”, e abilidad di resolve problema, colaboracion – esta traha hunto cu otro – y tambe con e muchanan cu tabata capta e informacion musical mas lihe cu e otro muchanan, a cuminsa demostra cualidadnan manera “Peer Mentoring” – esta guia otro den e proceso di siñamento.
Carlos a menciona cu e ta wak e Drum Camp manera un oportunidad pa e siña e participantenan un poco mas di e mundo amplio di percussion unda nan ta siña e fundamentonan di entre otro Drum Set, Percussion Latina (Congas, Timbal, Guiro, Guira, Wiri) Snare Drum y ‘Multi Pitch Reading’. Pero tambe e ta wak e Drum Camp como un manera pa recruit of discubri posibel talentonan nobo.
Nos a puntra Carlos di ki otro manera e Drum Camp a contribui na e panorama musical di Aruba. “Wel, ora ta trata di un “Forma di Arte” e desaroyo ta tuma su tempo pa asina ta efectivo den un comunidad of sociedad. Prome ta e introduccion di e Arte den forma di les, despues ta e nivel di logra e dominio di Arte, anto finalmente e aplicacion di esaki den e cultura of e folklore di e comunidad”.
Carlos a comenta cu atravez di e añanan varios di e participantenan di e diferente edicion di e “Drum Camps” a sigui desaroya nan mes anto sobresali den e mundo musical aki na Aruba. Tambe algun di nan a tuma e decision pa studia musica den exterior como percusionista.
Banda di esaki, Carlos a comenta cu atravez di e añanan el’a ripara cu su alumnonan cu ta sobresali a forma un nucleo di percusionista cu ta wordo uza door artistanan y gruponan cu sa participa den festivalnan local.
Nan ta wordo puntra pa toca como nucleo door cu nan conoce e ritmonan y tambe door cu nan por lesa musica anto cu esaki ta haci e ensayonan ta cana mas facil cu ta refleha nan profesionalismo.
Pa cu e aña aki e informacion di e “Carlos Bislip Drum Set & Percussion” ta lo siguiente:
Duracion: 4 siman – Dialuna pa Diabierna
Fechanan: Juli 12 te cu Augustus 6.
Ora: Session 1 (8:30 AM pa 11:30 AM); Session 2 (1:00 PM pa 4:00 PM)
Edad: 10 pa 14 (Session 1) 15 pa 18 (Sesion 2)
Costo: Afls. 400.00
Localidad: International School Aruba
Pa registracion:
Email: [email protected], Telefon: +297-592-6449 (Carlos Bislip)
No perde e oportunidad aki pa bo yiu por siña e fundamentonan di musica y percusion tambe desaroya otro habilidad cu lo por yud’e pa e resto di su bida!