Parlamentario drs. Mervin Wyatt-Ras a trece padilanti cu dia 22 di Augustus a cuminsa trata nos Codigo Civil den reunion publico. Esaki ta regarda un ley consistiendo 8 buki. Un di bukinan ta regarda Derecho di Famia y aki den tin varios cambio cu su persona y fraccion lo kier trece a base di combersacionnan cu su persona y colega Desiree de Sousa Croes y otro coleganan tabatin cu diferente stakeholders.
Den e comision encarga cu Asuntonan Social y Salubridad y e comision di Husticia, a scucha diferente instancia, manera Sociale Zaken. Voogdijraad, Fundacion Guia Mi, Respeta Mi, Stichting Casa Cuna Progreso, Kinderhuis Imeldahof, Centro Ortopedagogico, Fundacion Pro Lechi Mama, Fundacion Telefon pa Hubentud, Fundacion Pa nos Muchanan, Sostenemi, Parlamento Hubenil y fundacion encarga cu LGBT. Tambe a reuni cu Orde van Advocaten, Organisacion di Notarionan, Directie Wetgeving, Universidad di Aruba, un presentacion di Profesor de Boer. Alabes a reuni cu Directie Bevolking, departamento di Labor. Ademas a ricibi comentario di diferente instancia como preparacion di e ley y a base di esaki a haci preguntanan na Gobierno. Wyatt-Ras a pone varios comentario den un concepto di amienda cu e kier mira cambia y den deliberacion cu ministernan varios di e puntonan aki ya caba (t)a ser agrega den e nota di cambio di Gobierno. Wyatt-Ras ta spera cu Gobierno mes lo por trece e cambionan aki cu el a sugeri entre otro den su discurso y den preguntanan haci. Si logra e lo no tin cu presenta nan den un amienda. Paso importante ta pa proteha nos muchanan contra di cualkier tipo di abuso. E no ta bay pa cual instancia ta haci un trabou, ta bay pa ora un menor yega pa pidi yudansa e por haya esaki y no mester warda of wordo manda di cashi pa muraya. Ademas profesionalnan mester traha hunto no paso nan ta haya otro leuk sino pa garantisa derecho di cada mucha y proteccion di nos muchanan.
Wyatt-Ras y su colega ta den deliberacion cu diferente minister pa yega na cierto cambio den cooperacion cu lo haci posibel cambionan positivo ariba tereno di proteccion di nos hobennan. En bista cu continuacion di e reunion publico ta planea pa diahuebs e ta spera cu Gobierno por keda cla cu cierto cambionan. Aki ta trata alabes e cambionan pa loke ta trata geregistreerde partnerschap cu su colega kier introduci.