Mervin Ras ta trece padilanti cu dia 8 di September tabata un dia importante y historico unda cu a finalisa y a aproba un Codigo Civil nobo y moderno pa Aruba den Parlamento.
Ta trata di un ley, consistiendo 8 buki, di cual un di nan no a yega Parlamento ainda. Nan ta: Derecho di persona y famia, Vermogensrecht en general, derecho di herencia, Zakelijke rechten, parti general di Verbintenisrecht, acuerdonan special, medionan di trafico y transporte. Durante preparacion di e ley Wyatt-Ras a enfoca mas tanto riba familierecht y Ley di embaraso y parto.
Despues di a scucha cantidad di instancia hunto cu su coleganan Wyatt-Ras a haci diferente pregunta na minister. A base di esakinan minister di Husticia, drs. Arthur Dowers, a cambia e ley.
Un logro grandi ta cu den ley ta menciona cu lo apunta un punto central pa meld casonan di maltrato y abuso di mucha y cu ta duna conseho. Den articulo 243 ta menciona tur e diferente tarenanan di e punto central aki. Ademas minister a base di sugerencianan di veld ta agrega den ley cu minister di Husticia ta apunta e punto central aki. E minister lo mester consulta prome cu e minister encarga cu Asuntonan Social y esunnan di Salubridad. E hecho cu e meldpunt ta menciona den ley ta un adelanto grandi pa instancianan cu lo mester coopera cu otro, sincronisa ayudo pa pone e victima di abuso/maltrato hoben central enbed di nan propio instancia.
Na e definicion di maltrato di mucha den articulo 243 a agrega cu lo mester bin un meldcode obligatorio pa tur e profesional sa ki caminda tin cu cana ora haya nan confronta cu casonan. E punto aki a ser enfatisa den combersacion tambe cu esnan cu a entrega un Manifesto na Parlamento pa pidi atencion pa e problematica di abuso di mucha.
Otro cambionan ta cu a amplia articulo 247, e definicion di educacion, cu e palabra descuido. Ora regla tutela, desde e cambio di nos Codigo Civil tur dos mayor ta bira responsabel pa mantene un bon relacion cu otro den bienestar di e mucha. Pues mayornan mester drecha nan relacion di mayor cu otro. Esaki ta di importancia mirando e impacto grandi cu separacion di mayor tin riba un mucha. Tambe a agrega varios otro punto pa mehora con pa atende nos muchanan y Wyatt-Ras den nomber di fraccion a entrega un amienda cu puntonan adicional cu e no a mira cambia den e ley. Un di nan ta e tarea di e meldpunt pa fungi tambe como un punto di registracion di casonan. E otro punto ta pa haci posibel cu e meldpunt por haci su investigacion cerca tur henden cu di un of otro forma tin un relacion cu e menor, tambe profesional y mayornan.
Wyatt-Ras ta satisfecho cu pa medio di e cambionanan den ley lo bira mas facil pa entre otro mediconan tambe por meld casonan. Paso e bienestar di e mucha ta na prome lugar. Lo mester balansa entre “zwijgplicht” y proteccion di mucha.
Den articulo 199b ta regla cu e mucha tin derecho di sa ken ta su mayornan biologico. Den Afdeling of parti 4 ta regla “Gerechterlijke vaststelling vaderschap”. Pa medio di Art. 207 inciso 1 e mucha por haci peticion pa ser reconoci door di su tata durante henter su bida. E mucha por haci peticion hasta ora su tata fayece. E ley tin efecto retro-activo” te dia e mucha a nace.
Pa medio di Art. 208 e mucha por haya derechonan di e tata pa cria y paga alimentacion. E periodo di ricibi alimentacion ta ser prolonga te cu 25 aña den caso cu e hoben ta studiando. Esaki ta pa e mayornan cu no kier paga alimentacion. Un otro bentaha pa derecho di mucha ta cu ora ta trata areglo di “omgang” e mucha lo ser scucha, en especial e mucha di 12 aña pariba.
Art. 247 lid 2. ta prohibi violencia fisico y mental completamente. Esaki ta un conseho di e comision di derechonan humano na Maart 2009. E hecho cu no mag dal un mucha mas no lo haci e mucha malcria sino lo proteha e mucha. Intencion ta pa limita mayornan cu ta maltrata nan yiu.
Segun Wyatt-Ras analisando e leynan por bisa cu loke falta ta pa bin un ley general pa jeugdhulpverlening. Aki lo duna structura na e relacion entre diferente instancia y nan tareanan. Wyatt-Ras ta gradici tur instancia pa nan feedback y tambe coleganan pa nan participacion y sosten pa e reunionnan y tambe pa e amienda cu por a ser presenta y aproba cu sosten unanime.