Recientemente a entrega dos ambulance y dos vehiculo pa “Rapid Responder” nobo na IMSan. Director di Directie Volksgezondheid, Drs. Jerry Staring a haci entrega di e yabinan na Director Medico di Ambulance dr. Monica Nuboer. E yabinan di e dos rapid responder a keda entrega pa Inspector General di Salud, mr. Dorylee Lopez-Peña na Hefe di Servicio di Ambulance, Liberato Hoek.
Drs. Jerry Staring a referi na e ocasion como “un dia hopi special pa IMSan” y “un adelanto hopi grandi”, como cu ademas di e vehiculonan tambe a celebra cu a conclui e curso specialisa di enfermeria cu ta “Ambulance Verpleegkundige”. A haci entrega di diploma na 8 miembro di personal di ambulance cu a slaag pa e opleiding aki y e otro 12 miembronan di e personal a completa e sesion special pa repasa nan conocemento di e mesun curso, cual nan a tuma caba anteriormente.
Cu esaki, tur 20 empleado cu ta traha riba ambulance como nurse a completa cu exito e curso di e nivel di mas halto den nan ramo di trabao. Y tambe e instructornan di hulanda a duna elogio na e chaufernan di ambulance pa nan excelente trabou
Di acuerdo cu Jerry Staring, e “rapid responders” ta un team di profesional cu ta core den vehiculonan cu no ta ambulance, pero por yega cu e tipo di vehiculo cu nan tin na luganan cu ambulance no por yega, duna e prome asistencia y warda riba ambulance ja cu nan no ta transporta pashent. Nan por yega tambe mas lihe y adelanta na accidente y calamidadnan.
Ambulance di Aruba tin suficiente material di bon calidad y suficiente personal specialisa den e ramo asina importante, cu ta hunga un rol hopi grandi den percura pa e pashent den loke ta conoci como e “golden hour”, pues e “un ora valioso” despues cu un incidente medico of accident tuma luga. E nivel di e personal ta masha importante, Staring a agrega.
Aruba tin un calidad hopi halto di Servicio di Ambulance, pa cu su materialnan, ekipo y su personal, Jerry Staring a subraya.