Cu nombracion di Drs. Jerry Staring, Bsc den e funcion di director di DVG, ta inicia un era nobo den e departamento di Gobierno. Ta anticipa un cambio di cultura y introduccion di un vision y mision cu tur empleado ta reconoce y lo ta dispuesto pa ehecuta. Ta varios cambio y progreso tabatin den e ultimo 2 añanan caba, den preparacion pa e nombracion di un director nobo.
Documentonan oficial den archivo di Gobierno di Aruba ta mustra cu for di aña 1917 tin un movemento riba un departamento pa maneha asuntonan di salud publico na Aruba, pues otro aña DVG of DESPA ta celebra 100 aña di existencia! Na 1917 a trece un curpa morto for di Corsou pa Aruba y asina a realisa cu mester di un maneho con ta atende cu situacionnan asina. Ta di eynan a crea un “Kinderarts Besluit” pa vacuna muchanan y tambe a nace e “Higienische Dienst” den unda a cuminsa educa comunidad riba labamento di man y cuminsa introduci reglanan pa negoshinan cu tabata bende alimento.
Pa straño cu por zona, e departamento a funciona pa casi 100 aña sin un “instelling besluit”. Comosifuera poco, nunca a traha un “formatieplan” tampoco, den unda ta stipula y ta discribi cada 1 di e 82 funcionnan den e departamento. Tampoco den e casi 100 añanan no a prepara nunca un “Personeelhandboek” den unda ta stipula e reglanan cu trahadonan mester tene nan mes na dje, ni un “Verzuim Reglement”, “Ziekteverzuim Beleid”, “Visiedocument” of tampoco un “Strategisch Plan”. Bisando esaki, ta hopi trabou, hopi investigacion, deliberacion, dialogo y inversion di tempo a bay den preparacion di tur e rapportnan, maneho y vision pa DVG.
Cu inicio di e era nobo den Directie Volksgezondheid Aruba, lo haci tur posibel pa logra cambia e cultura di un “Uitvoerende Dienst” pa un “Beleids Directie”. Ta e meta pa DVG fungi como e parti central den cuido na Aruba, conectando tur otro stakeholdernan. E departamento mester demostra profesionalismo, dinamismo y etica halto den tur trabou cu nan ta desplega.
Directie Volksgezondheid ta situa den Caya Ing. Roland Lacle, parti den 6 edificio banda di otro y 2 otro edificio situa na Barcadera, unda tin Servicio Veterinario y GKMB. Na tur e departamento ta conta cu 170 empleado bon prepara y capaz pa sigui desaroya e organisacion pa implementa y ehecuta maneho riba tereno di salud publico na nos isla.