Relaciona cu e caso di e turista cu a purba di drenta Aruba cu mangel di droga, directora di FADA, Sra. Rullienne Arends ta elabora ariba esaki.
Pa FADA esaki no ta nada nobo, ya nan tin hopi luna ta papia den diferente ruedanan di prensa, companianan, unda cu nan ta menciona cu awendia droga no ta hay’e solamente den forma cu ta conoci. Pero nan ta formando poco poco pa den forma di mangel, trece e droga na Aruba. Esaki ta algo cu hopi hende no a por a haya e prueba cu ta berdad. Lamentablemente tabata tin un caso, unda cu’n turista a purba drenta cun’e y danki Dios cu Duana a haci un bon trabao, di gara e droga aki prome cu el a yega mas leu. Ta momento pa tur hende bira un tiki mas consciente.
Sra. Arends, di FADA a splica cu nan ta trahando pa trece prevencion, pero a pesar cu FADA ta haci un tremendo esfuerso pa trece tur e informacion na hobennan y adultonan tambe. E ta un momento hopi importante unda tur hende mester cuminsa bira mas consciente di e peliger cu droga ta representa na nos comunidad.
Mas aleu, Sra. Rullienne Arends tambe a bisa cu mayornan lo mester papia cu nan yiu, conseha nan, na e hobennan y muchanan y splicanan tocante e sorto di droga aki di mangel, anto cu nan no mag di ricibi nada di come of bebe , anto mas tanto e mangel aki cu lo bin den presentacion di gummy, cu mayoria di mucha ta gusta, djis bati alarma di kico lo ta e risico cu lo por ta, di djis por ehempel acepta un mangel di un hende straño of cu no ta confia den dje.
Esaki ta e oportunidad perfecto, cu nan por touch e tema aki un tiki mas, ya cu nan ta haciendo esaki mas, mirando cu tur hende por a wak cu prueba, cu di berdad e ta existi. No ta solamente cu e ta existi na paisnan grandi, cu e por yega Aruba. Ta bira un momento cu ta bay papia hopi mas di dje, bin cu hopi mas ehempel. No solamente pa hoben, pero pa hende grandi tambe.
Tin otro tipo di droga den mangel tambe, no solo marihuana, droga ta cambiando su forma, y pueblo lo mester ta consciente y alerta riba esaki, y cu e tipo di droganan aki tambe lo por wordo cumpra online anto e ora mester controla e hobennan pa nan no bay cumpra online, Sra. Rullienne Arends a informa.
Asina tambe, FADA sigur lo bay inclui tur e topiconan aki den nan proximo charlanan, unda cu lo bay papia di e tema aki, e sorto di droganan nobo, traha riba su prevencion, segun Sra. Rullienne Arends, di FADA.