Presidente di SIMAR, Sra. Sheila Tromp, ta splica tocante di e problemanan cu falta di airco na scolnan ta trece den e temporada aki di calor.
Sra. Tromp ta repasa cu aña pasa tabatin ola di calor y Minister a duna permiso pa tur scol cera trempan debi cu alrededor di 11’or di mainta e temperatura halto di calor ta bira insoportabel den e klasnan. Sra. Tromp ta papia den nomber di Pius X School unda e ta funciona como cabesante cu bou guia di SIMAR nan a hiba e lucha aki. Di eynan tambe a sali e comision di airco unda cu diferente scolnan a bin sinta hunto pa nan haci un inventario riba e situacion di airco na e scolnan. Di eynan a bay un comision cu a bay traha hunto cu TNO pa bay haci un investigacion bou tur e scolnan con e situacion ta cu coriente y airco y con ta bay haci esaki. Den e caso di Pius X School el a cera trempan den e ultimo simannan di scol, pero esaki ta debi na trabounan cu tabatin rond di e scol.
Nan a amplia e trabounan y hib’e den e bario completo, pero nan a deposita materialnan y cero di santo net patras di e scol cu tabata casi imposibel pa habri e bentananan, pasobra biento tabata supla tur e santo paden. Y si mantene e bentananan cera, no tin circulacion di aire den klas. Nan a haya hopi keho di scolnan, maestronan cu tabata bira malo, maestronan tabata indica cu alumnonan tambe tabata bira malo. Dus esaki tabata necesario pa nan a hiba e manifiesto na Minister, a cuminsa haci e trabou, a keda cla cu e comision.
E luna aki nan ta bay haya un presentacion di e comision hunto cu TNO y Minister unda cu nan a duna conseho na Minister riba kico lo por bay haci. E ta un costo hopi grandi si wak tur e scolnan y si wak e scolnan cu tin conexion di coriente anticua, dus nan tin cu bay cambia ful e sistema. Esaki ta un costo hopi grandi, pero si cuminsa trah’e di un manera structura, por yega poco poco na esakinan.
Sra. Tromp ta indica cu e vergunning a wordo firma pa tres scol pa nan por cuminsa cu e preparacion pa pone airco. Despues ta bin otro tres scolnan, despues lo bay wak con lo haci cu e demas scolnan en cuanto e problema aki.