Despues cu nos a haya basta awasero, esaki sigur lo trece cune criaderonan di sangura. Di parti di Salubridad Publico, ta un bon momento pa pueblo mes controla rond di nan cas, pa asina preveni, segun dr. Wilmer Salazar.
Awor cu horcan Matthew a bin y yobidanan cu ta biniendo despues di dje, y awor cu nos ta drentando den un temporada di yobida, ta momento pa intensifica mas tanto comunidad, pa por mantene su cura y su cas paden y pafo liber di posibel criaderonan di sangura, pa evita loke semper cada aña ta bin bek. Si haci esaki, e ta wordo controla. Durante accion di swipe team, cu e grupo conhunto, na Januari, tabata Serlimar, DOW, Departamento di Salud Publico, GKMB, Epidemiologia, DBZ entre otro, a traha pa disminui drasticamente tur e luganan potencial pa criadero di sangura y a mantene un efecto positivo, cu participacion di comunidad. Ta asina cu durante e lunanan ey te awor aki, ta bou di e limite di e canalnan endemico. Esey ta nifica cu e cantidad di casonan di malesanan transmiti pa sangura, manera Dengue, Chikungunya y Zika a baha hopi cu nos ta den un low risk, tumando na cuenta nos region, cu tin su problema, pero aki na Aruba ta hopi abao y cu na luna di Mei no a presenta mas caso di Zika.
A puntra Dr. Salasar kico ta loke mas nos mester tene cuenta cune den e dianan aki pa loke ta e problemanan di criadero,
Awor aki berdad tin yobida, cambio climatologico den un temporada di calor, pa drenta den un temporada di temperatura un tiki mas abao cu solo no ta sali mucho, cu por aumenta problema di criadero. Si nos mantene nos casnan, rond di dje y paden di dje liber di criadero, e ora ta sigur cu ainda nos ta keda safe.
Salazar a agrega cu tambe nos ta drentando den temporada di griep. Tin e vacunanan di 2016 y 2017. Ta pidi comunidad pa esnan cu tin factornan di riesgo, pa por fabor tuma e vacuna lo mas pronto posibel, pa asina evita loke aña pasa a bin ta presenta e mesun influenza, pero tabata un tiki mas severo cu su consecuencianan.