Dr. Selene Kock un profesional medico, un yiu, un ruman, un mama di tres yiu pero principalmente un persona cu un curason noble pero tambe cu un mentalidad determina.
Dr. Selene Kock a pasa casi dies aña studiando y ainda ta sigui cursonan y educacion continuo pa mehora su mes. Na un edad jong el a confronta cu e hecho cu mester opera su lomba na dos ocasiony tambe Dr. Selene Kock a haya tres yiu durante su carera medico. Pero nada di esaki no a strob’e pa cumpli cu su meta di bira dokter y bolbe su pais natal bek pa duna su contribuicion.
Awor el a dicidi di drenta activamente den politica, pasobra e ta sinti cu cosnan por a bay miho, si esnan encarga tin e conocemento necesario.
Dr. Selene Kock a nace na Aruba, a biba na San Nicolas y despues na Savaneta, prome cu el a bay Hulanda pa cumpli cu su soño di bira dokter. Na prome instante e no a haya chens y mester a tuma e rumbo di cuminsa cu e opleiding di Psychologie. Pero, el a pone como meta cu nada no ta bay strob’e, y ya caba den e prome aña el a logra cambia di opleiding y cuminsa cu Geneeskunde na Maastricht. Ey ta caminda cu el a haya su mes den un accidente y mester a opera su lomba pa di dos biaha. Pero esaki tampoco a strob’e den su estudio. “Unabes mi a pone como meta cu mi kier bira specialista y bolbe mi pais, ta esey ta loke cu mi ta haci.”
Dr. Selene Kock a finalisa su studio di medico basico na aña 2004 y a ricibi e sorpresa grandi cu henter su famia a acudi na su graduacion.
Na 2005 ya caba el a cuminsa cu su specialismo di pulmon y bolbe Aruba asina cu el a finalisa su specialismo na 2010.
‘ Fo’i dia cu mi a bay Hulanda, mi meta semper tabata pa bolbe Aruba. Esunnan cu bolbe ta pasobra nos amor pa nos pais, pa nos famia y amigonan aki nan t’asina grandi cu no tin nada pa reemplace. Nos como Arubianonan mester bin bek pa yuda hiba Aruba bay dilanti. E pais ta inverti den bo, pero ta mi deber pa hiba nos sistema di salubridad na un nivel mas halto, den mi caso,” dr. Kock a comenta na MasNoticia.
Den dr. Selene Kock su ramo tin hobennan profesional cu no ta bolbe, pasobra nan kier haci investigacion pa bira profesor of sigui studia. Pero awo tin cambio, pasobra na Aruba mes ta posibel pa haci e trabou y investigacionnan necesario pa logra promove pa e titulo di Ph.D.
Na dr. Horacio Oduber Hospital tin un trayecto supervisa door di profesor cu por guia tur e profesionalnan, asina nan por promove y obtene e titulo di Ph.D y despues lo por wordo reconoci cu e titulo di profesor.
Aki na Aruba mes tin hopi posibilidad. Aworaki nos ta trahando riba un Universidad di Medicina. Tin por ehempel Xavier University, unda cu por haci e estudio basico di tres aña. Pero tin un plan nobo pa por logra haci tur e seis añanan di medicina basico na Aruba mes. Pa por logra esaki, mester yega na un bon cooperacion entre diferente ministerionan. ‘Si tur hende traha hunto, kita tur barera y traha den bienestar di nos pais e plan aki ta bira realidad.’
“Ademas di aporta na mi pais den e ramo di salubridad, pa Aruba ta un lugar no solamento dushi pa biba cu un cuido cualitativo pa un y tur, pero tambe mi kier aporta y crea diferente posibilidad economico. Mi vision pa futuro ta turismo medico, turismo deportivo, etc, creando pilarnan nobo pa e economia’. Esaki ta algun punto cu dr. Selene Kock, candidata number 8 riba e lista di AVP kier logra si e haya sosten y e voto di confiansa dia 25 di juni venidero.
Den bida mester pone meta y traha duro pa logr’e. Pa Selene Kock su postulacion ta hopi importante cu e finalidad di eleva nos sistema di salubridad, reorganisa cuido, sin infraccion riba e derecho humano.
“Ni un meme di mi prome presentacion publico no ta stroba mi di e meta aki. Mi no ta perde soño di e memenan traha. Al contrario, nan a pone mi hari hopi y algun di nan hasta mi a pone den leishi,” e candidato nobo di e partido berde, dr. Selene Kock a comenta.