Siman a habri cu un candidato politico nobo riba e lista di Partido MAS. Partido MAS a anuncia nan candidato nobo dr. John Croes dialuna ultimo, despues di a sinta hunto y mira cu nan vision pa sirbi e miho interes di Aruba ta igual.Di e forma aki, Partido MAS ta considera e union hunto cu dr. John Croes uno di hopi balor no solamente pe partido pero tambe pa pais Aruba. Dr. John Croes ta convenci cu su entrada den e arena politico ta un dia importante pa destino di salubridad publico di Aruba. Dr.Croes ta cla pa pone tur su experiencia riba mesa pa soluciona e problema grandi cu nos tin den salubridad publico na Aruba. Dr. John Croes su enfoke primordial ta pa nos bay cambia di un sistema curativo pa un sistema preventivo di salubridad. Esaki ta unico manera cu un Gobierno lo por carga cu e gastonan di nos pais. Banda di esaki, dr. Croes ta convenci cu nos mester educa nos comunidad mas miho riba e tema aki pa asina hunto trece un cambio pa nos isla. Finalmente, tecnologia ta hunga un rol grandi den e desaroyo di salubridad y Dr. Croes ta mira cu hunto cu Partido MAS, lo por concretisa diferente plan na bienestar di nos pais. Esaki ta algun di e rasonnan pakico dr. John Croes ta uni su mes na Partido MAS pa kibra barera y crea futuro. Partido MAS ta yama dr. John Croes bon bini na e partido rumbo pa exito dia 22 di September.