Coleganan di Josselyn Rodriguez tabatin hopi cos bon di bisa di dje. Cosnan cu e no tabata sa cu nan tabata aprecia asina tanto di dje, y cu a conduci na e nominacion pa e bira empleado di luna di october di Dr. Horacio E. Oduber Hospitaal. Josselyn a keda sumamente sorprendi pa e nominacion y masha honra cu e reconocemento aki.
Josselyn tin hopi aña ta traha riba piso “Snijdend 3” unda cu e ta enfermera. E ta gusta su trabao unda cu tur dia tin reto nobo y algo nobo pa siña. El a expresa cu e ta sumamente contento di forma parti di e team riba e piso aki y di por forma parti di Hospital, unda el a cuminsa traha prome como studiante. E tabata un “hulp” te cu el a logra yega na su carera como “verpleegkundige”.
E tambe ta un Verpleegkundige Coordinerende Taken (VCT) unda cu e funcion aki ta un reto hopi grandi pe pero e ta orguyoso di tin e funcion aki. Den transcurso di añanan el a crece den conocemente, pero principalmente tambe a crece como persona. Josselyn ta gradici su team pa e nominacion y cu nan a comparti cune puntonan di su mes, con nan ta wake, y e ta agrega cu emocion den su stem cu ta un satisfaccion pa sa cu su coleganan ta pensa asina bon di dje.
E zorgmanager encarga cu Snijdend 3, sra. Monique Verwoert, a conoce Josselyn prome como colega y despues a bira su manager. Sra. Verwoert ta comenta cu e ta un colega hopi lief, ta traha duro y ta practicamente resistente pa stress.
Pa Josselyn, e pashent sigur ta central, su zorgmanager ta remarca. E ta splica cu Josselyn ta haci tur loke e mester haci pa e pashent pero e tambe tin un forma colegial di adresa cierto asuntonan. Por ehempel, ora e no ta di mesun opinion cu colega of dokter tocante un pashent, e ta duna su feedback na un manera profesional y esaki tambe e ta haci na coleganan di otro departamento. E ta sincero den su manera di traha cu ta haci cu semper e ta ricibi e cooperacion necesario.
Segun sra. Verwoert ta splica, Josselyn ta hopi importante pa e afdeling; e ta para como abogado pa e pashent, y pa su coleganan e ta colegial y ta coopera semper cu nan.
Su hefe ta conclui bisando cu Josselyn Rodriguez ta un bon mama y ta bisto cu e tin un bon balanse entre cas y carera. Hospital ta gradici Josselyn pa su empuhe y ta felicit’e cu e reconocimento bunita aki. Masha pabien!