Dr. Elizabeth (Eliza) de Sousa Fernandes Perna, naci na Aruba (1988) recientemente a obtene su titulo di ‘doctor’ na Universidad di Maastricht. Despues di a gradua como Neuro-Psycologo na 2012, Eliza a inicia mesora cu su PhD-investigation program na ‘Department of Neuro-psychology & Psychopharmacology’, ‘Faculty of Psychology & Neuroscience’ di dicho Universidad.
Den e trayecto di su PhD, Eliza a forma parti di e proyecto di investigacion “Addictions & Lifestyles in Contemporary Europe: Reframing Addictions Project” (ALICE RAP) cu a wordo inicia pa e Comision Europeo (http://www.alicerap.eu/, Area 4, Work Package 11.3). Meta mayor di ALICE RAP ta pa provee un base cientifico y alabes provee un asercamento corectivo y preventivo den e lucha contra adiccion. Den cuadro di e programa investigativo, Eliza tabata encarga cu diferente projecto experimental y a participa na diferente congreso internacional como nacional. Durante casi un aña, Eliza a colabora cu “Institut Hospital del Mar d’Investigacions Mèdiques” (IMIM) na Barcelona, Spaña, ariba un proyecto tocante “Novel Psychoactive Substances”, unda e efectonan di mefedrona (un tipo di stimulante) ariba funcionamento neuro-cognitivo a wordo investiga pa prome biaha riba hende.
Diahuebs, 17 di November 2016 pa 12:00 or, den Aula pa Disertacion di Universidad di Maastricht, Eliza a defende convincentemente su tesis doctoral, titula: “Exposed: Interactions between acute drug experiences and affective cues”. (ISBN: 978-94-6328-116-4). Defensa a tuma luga dilanti di un panel di evaluacion, consistiendo di:
Prof. Dr. W.J. Riedel, presidente di e comision di evaluacion, (Maastricht University);
Prof. Dr. I.H.A. Franken, Erasmus University, Rotterdam;
Prof. Dr. M. Farré, Universidad de Barcelona/IMIM;
Prof. Dr. R. de la Torre, Universidad de Barcelona/IMIM;
Prof. Dr. S.A. Kotz, Maastricht University;
Dr. J. Prickaerts, Maastricht University;
Dr. V. van de Ven, Maastricht University;
E meta principal di e disertacion aki tabata, di un banda, investiga e interaccionnan entre experiencianan causa pa uzo agudo di droga y exposicion na estimulonan afectivo, y, di otro banda, evalua e interaccionnan entre e diferente droganan durante exposicion simultaneo na multipel droga. A haci estudionan experimental tipo dobel ciego controla pa placebo (double-blind placebo-controlled experimental studies), pa investiga e efectonan di un gama amplio di droga, manera alcohol, marihuana, cocaina, MDMA y mefedrona. A midi entre otro funcionamento neuro-cognitivo y efectonan subhetivo na momento di concentracion maximo di plasma cu droga den sanger. E estudionan describi den e prome tres capitulonan di e disertacion a investiga si actividad celebral y funcionamento neurocognitivo ta cambia durante intoxicacion despues di exposicion na estimulonan di mercadeo di droga, estimulonan di expresion emocional di cara y estimulonan agresivo. E estudionan den e siguiente capitulonan a evalua si exposicion na un droga ta fortifica of ta blokia e efectonan causa pa un otro droga.
Interesante ta e hecho cu cuatro di e cinco investigacion c.q. capitulonan di e tesis di Dr. Eliza, ya caba a wordo publica pa diferente revista cientifico renombra internacional (Addiction Biology). Ademas, resultadonan di un investigacion/capitulo tambe a wordo cubri door di diferente corant renombra manera: “The Washington Post”, “The Portland Press Herald” y “De Morgen”.
Dr. Eliza a expresa palabra di gratitud na su team di promocion, bao liderasgo di Prof. Dr. Jan Ramaekers como su promotor principal, como na su dos co-promotornan: Dr. Eef Theunissen y
Dr. Kim Kuypers.
Pa e ocasion special aki, hopi di e coleganan di Dr. Eliza, como tambe amistad y conocinan a atende e ceremonia di disertacion. Igualmente for di Aruba a duna acto di presencia e mayornan di Dr. Eliza, Jose y Glenda Fernandes Perna/Krozendijk, ruman homber Albee y Roxenne cu nan yiu Jeon. Tambe famia Krozendijk, Croes, van den Berg a wordo representa pa Filomena Croes-Krozendijk, Hildreth, Rene y Kevin van den Berg-Krozendijk, Reuben y Tanhee Krozendijk. Demas famia na Hulanda y Aruba por a sigui, en bibo, e defensa di Dr. Eliza atrabes di internet.
Mientrastanto, Departamento di Neuropsycologia & Psychofarmacologia di Universidad di Maastricht, a ofrece Dr. Eliza de Sousa Fernandes un contract Post-doctorado, pa continua cu su investigacion encuanto “Novel Psychoactive Substances”, formando parti di e proyecto a nivel Europeo “Predicting Risk of Emerging Drugs with In silico and Clinical Toxicology” (PREDICT), pa por evalua nan efecto riba curpa y funcionamento neurocognitivo di hende. (http://www.predictnps.eu/).
Famia, conocirnan y amigonan a felicita Eliza cu su logro academico y ta dese’e tur clase di exito den su carera profesional.