Proximamente dr. Edwin de Cuba, dokter di cas na Santa Cruz, entrante 1 di mei su contract cu AZV ta termina. Esaki en general ta e caso ora cu e dunadonan di cuido ta yega e edad di pension. Sra. Solange Tchong, vocero di AZV ta splica kico lo pasa cu e pashentnan di dr. Edwin de Cuba.
AZV ta gradici dr. de Cuba pa su servicio desde 2003 y ta informa pashentnan di dr. de Cuba cu lo tin un traspaso automatico. AZV tin e responsabilidad pa percura pa cuido medico continua y den e caso aki, a haya un dr. di cas nobo, entrante 1 di mei 2019.
Dr. de Cuba tabata tin 2325 pashent. E 2325 pashentnan aki, pa sigura cu e cuido sigui, 2 mil pashent lo wordo traspasa pa dr. Lea Vinck, cu a studia medicina na Bogota, Colombia. El a hasta traha na Hulanda unda el a haya interes pa ta dokter di cas. Na 2016, el a inscribi su mes pa e trayecto di Huisartsenopleiding na Aruba, via VU di Amsterdam. Aworaki, el a termina esaki cu exito.
Dr. Lea Vinck lo tuma 2 mil pashent di dr. Edwin de Cuba, y tambe na praktijk di dr. Edwin de Cuba, tin dr. Charlotte van Horenbeek trahando caba. Dr. van Horenbeek lo tuma e resto di e practica over. AZV lo manda un carta na tur e 2325 pashentnan di dr. Edwin de Cuba, pa informa di e traspaso automatico tanto pa dr. Lea Vinck y dr. Charlotte van Horenbeek. Ta hopi imporante ta pa tuma nota, cu den e carta ta duna informacion tocante e continuidad di cuido y tambe kico pa haci den caso cu no ta di acuerdo cu e traspaso automatico aki, segun Sra. Solange Tchong, vocero di AZV.