Segun informacion recien, Sector Horeca ta bay ta creciendo y hopi hende cu tabata por ehempel haci trabao di mantencion no t’ey mas, sea nan a bay bek nan pais of otro motibo, pues a puntra DPL kico por haci pa e mercado local por haci e trabaonan aki tambe. Director di DPL sr. Ronny Irausquin ta bisa cu ta importante pa tene cuenta cu esnan cu ta busca trabao, berdad por ta buscando un trabao cu abo lo desea di haya pero na e momentonan aki ta conseha tur hende tuma e trabao cu tin aworaki.
“Locual cu por ta bo ta busca, bo no ta bay haya asina facil. E parti di Room Attendant etc ta funcionnan cu ta bini mas pa dilanti y cu mas ta wordo pidi akinan na DPL. Mi ta kere cu na momento cu DPL acerca bo persona cu ta busca trabao pa haci e tipo di trabaonan ey, mi ta kere lo ta bon pa evalua si ta okay tuma e trabao, pasobra na e momentonan aki ta dificil pa haya trabao”, segun sr. Irausquin.
Awe Departamento di Progreso Laboral a duna un rueda di prensa pa anuncia e re-introduccion di Arbeidsmarkt Registratie. Esaki ta un procedura conoci caba pero awor lo wordo re introduci entrante 1 di November.
DPL ta analisando e mercado, y e demanda di e departamento laboral aki cu tin como responsabilidad pa yuda esnan cu ta buscando trabao, y naturalmente bao maneho di ministerio di asuntonan social y labor ta trece esaki na dilanti bon cla cu nos hendenan mester haya e derecho pa un trabao.
E proyeccion aki ta yuda DPL y Ministerio pa tin un bista cla pa otro aña riba kico ta e demanda riba e mercado laboral. Cu e re introduccion aki logicamente DPL ta informa di lo bay traha na unforma mas eficiente y cumpliendo cu deseo, maneho y vision di minister di Labor. E procedura di Registracion Arbeidsmarkt lo ta disponibel riba website di DPL [www.dpl.aw] tur persona cu ta buscando informacion por tuma contacto cu DPL.
DPL tambe mester a ahusta su servicionan mirando e situacion cu e pandemia a trece cu ne, pero den forma pro activo nan kier keda den contacto cu tur cliente pues ta percura pa pone tur informacion disponibel riba plataforma di Facebook y nan website. E formularionan aki ta disponibel pa download Online pa registra.
DPL a cuminsa haya reaccion caba for di dunadornan di trabao. “Tur hende cu ta bay traha un cas, logicamente mester tin un plan. Cu e plan aki bo ta bay wak cuanto bloki bo tin mester, kico ta e midinan, cuanto ta e costo di ehecucion, y logicamente bo lo hink’e den presupuesto cuanto persona, den cuanto tempo lo keda cla, manpower y kico tur mester bo lo planifica adelanta”, segun sr. Lionel Croes, marketing manager di DPL ta splica. E ta sigui bisa cu esaki cu lo ta algo facil pa companianan cu ta haciendo proyectonan por sa di adelanta caba tur costo y planificacion y demanda cu lo tin tambe, pues e formularionan aki ta disponibel riba DPL su website. “Nos kier yuda comunidad pa bini bek riba pia. Esey ta nos tarea, nos responsabilidad como departamento y nos ta convenci cu nos ta ricibi cooperacion di e dunado di trabao, conhuntamente cu tur institutonan pa sa realmente e demanda cu tin por ehempel pa e trahadonan”, segun sr. Croes.
Esaki lo haci cu DPL den un forma adelanta lo por busca trahadonan tambe riba mercado laboral pa cumpli cu e demanda yena ariba e ArbeidsMarkt Registratie.