Trabounan na Carnival Village na San Nicolas ta andando den full swing, cu construccion di algun kiosco y tambe bañonan. Sr. Jossy Kock, ta hefe di e Departamento Uitvoer, a splica tocante e trabounan aki u ta andando actualmente na Carnival Village na San Nicolas.
Actualmente ta trahando ariba algun kiosco y tambe algun baño. E prome tres kiosconan cu ta na e parti pariba/panort, nan ta bezig den e preparacion di e dak. E otro tres kiosconan cu ta banda pabou/pazuid, eynan ta bezig cu pegamento di bloki te cu ringbalk.
Segun Sr. Kock, si tur cos bay bon, e siman aki ainda lo prepara pa basha ringbalk. Pa loke ta e block di baño, aki falta e pegamento di bloki. Ademas di esey, ta bezig pa cuminsa coba pa pone tur e tubonan necesario cu mester bay pa e kiosconan.
E proyecto aki tin como 2 siman di retraso, pero e contratista a sigura cu esey no ta bay ta problema y cu dia 2 di september e proyecto lo wordo entrega manera stipula.