Por medio di mal tempo, algun di nos beachnan a conoce daño y awor no por core bay drecha esakinan mesora. Pero tog tin beachnan cu ta keda wordo inverti den nan pero tog nan ta keda kibra. A puntra director di DOW, Marlon Croes si tin plan pa bay pone mas piedra den lama pa e stroming etc.
E director ta splica cu beachnan ta algo dinamico, nan ta cambia den transcurso di aña segun e coriente di lama ta cambia, e beachnan tambe ta cambia. Eagle Beach ta un di e beachnan hopi activo unda cu e santo blanco ta transporta su mes for di Eagle Beach, pasa full rond y bay te na Bushiri den lama, y despues cu bini cambio di coriente of climatologico, e coriente ta cambia y transporta e santo bek na Eagle Beach. “naturalmente bo kier proteha tur bo beachnan y si bay traha of pone piedra den lama pa por contene e zee stroming, bo por drecha un beach, cuida uno pero daña e otro”, segun sr. Croes.
Mester wak pa solamente no tuma medida, pero pa tuma medida cu ta cumpli cu totalidad di nos beachnan segun sr. Croes. Pasobra pa bay drecha un beach bo por daña tres permanentemente. Tin cu wak con pa traha cu naturalesa pa por yud’e.
Algun aña atras, den e strip di Tamarijn tabata tin hopi perdida di santo. A bini cu un projecto pa deposita dos biaha 10 mil cube di santo na un luga, y pone 15 mil land based suplitie – dos biaha 10 mil den awa, anto laga e coriente mes transporta esaki. “Esaki a resulta hopi bon te cu awe bo por wak e bon resultado”, segun sr. Croes.
Esey ta tipo di trabaonan cu tin cu haci pa traha cu naturalesa pa asina no bay purba regul’e. Tin hopi boei kibra tambe pero esaki no ta cay directamente bao di DOW, esaki ta pa mustra area di landamento cual ta cay bao responsabilidad di DIP.