Durante un conferencia di prensa, DOW a bin dilanti splica kico ta e trabaonan tumando luga ariba Aruba su infrastructura. Sr. Marlon Jacobs, Chef Infra & Verkeer ta amplia mas dunando un descripcion den e areanan unda ta bay tin trabaonan cu lo tuma luga.
Tambe Sr. Jacobs a bay mas den profundidad ariba e trabaonan cu nan ta bezig cun’e awor. El a menciona cu, logicamente, cu tin un capacidad limita banda di e magnitud enorme di trabao cu tin. Esaki no ta cuestion di soluciona un problema y cla. E ta algo cu ta keda presente su mes y mester keda mantene, keda ataca na e manera mas eficiente cu ta posibel, den menos tempo posibel.
Ora ta papia di buraco den caminda, DOW ta na altura cu ta trata di camindanan hopi bieu y ta purba di mantene nan mas miho posibel. Trabao di patchmento ta un trabao enorme. DOW tin capacidad di 4 truck y nan ta sali cu x cantidad di material tur dia. Den temporada di yobida e ta costa hopi mas esfuerso pa por cumpli manera debe ser cu e trabao. Den hopi ocasion, DOW ta traha overtime den weekend, pa trata di yega na un resultado mas optimo cu ta posibel.
Siguientemente, e rutanan unda cu lo bay patch for di diaranson te cu diabierna, unda cu tin 2 truck ariba caminda, haciendo esaki.
E prome truck lo ta bezig den area di Nuñe, Seroe Blanco, Primavera (banda di Citgo), Sabana Blanco, banda di ex Stern Automotive, Pindastraat (Dakota), Caya Juancho Kock (Dakota). Depsues nan lo mobilisa pa Montaña/Boegoeroei, pa despues sigui pa L.G. Smith Blv (Sasakiweg).
E di dos truck ta bay ta bezig pariba di brug, den area di Rooi Koochi, Savaneta, Citgo Savaneta, Seroe Alejandro.
E dosnan aki ta e ruta di diaranson.
Pa diahuebs 1di november, e prome truck ta bay ta na Seroe Blanco, Paradera, Palm Beach, Sabana Liber, den e area CMB Noord y tambe banda di ex Aruba Bank na Noord. Ademas di e lus di traficonan na Palm Beach, Wendy’s bin ariba.
E di dos truck lo ta bay ta na Adriaan Lacle Boulevard, L.G. Smith Boulevard (area di Parlamento di Aruba), Weststraat, APA (Turborotonde), Kerkstraat, hendrikstraat, Postkantoor, Emmastraat, Professor Lorenzstraat.
Esaki ta apenas 1 di november, y asina sucesivamente lo tin un area pa haya patching. Tur dia DOW ta evalua prioridadnan. Na dado momento si tin un buraco grandi riba un caminda principal, esaki tin prioridad. Pero semper tin posibilidad, ya cu tin meldpuntnan unda cu por duna keho y DOW ta evalua esaki. Y cu tiki pasenshi, cu e capacidad limita, DOW lo yega eynan.
Ora di patch un caminda di santo, esaki ta bay hopi mas lihe, entre 1 ½ pa 2 ½ km pa dia. Naturalmente, DOW ta tene consideracion cu tur bario, pero nan tin prioridad, cual ta e camindanan cu tin den cero, unda cu e awa ta baha, lastra e tera bay cun’e, segun Sr. Marlon Jacobs, Chef Infra & Verkeer.