Departamento di Obra Publico ta desea di informa e comunidad di Aruba, pero specialmente e automobilistanan cu ta haci uzo di e caminda di L.G. Smith cu dialuna 10 di juni 2019 cu a pasa a cera e caminda for di rotonde Eagle Bowling te cu rotonde Superfood banda Oost pa asina por cuminsa fase 1 y pone e ultimo capa di asfalt. Duracion di e ceramento aki lo ta te cu dia 21 di juni 2019. Desviacion ta via rotonde di Eagle Bowling direccion Hato, Caya Musica y San Miguel.
Fase 2. Diaranson 12 di juni 2019 lo cera rotonde di Superfood completo y e banda West di L.G. Smith Blvd. te cu rotonde di Eagle Bowling pa asina pone e ultimo capa di asfalt. Rotonde di Superfood lo habri diadomingo dia 16 di juni 2019 y e caminda banda West lo habri te cu dia 21 di Juni 2019. Desviacion ta pasa dilanti RWZI Bubali pa asina yega Juancho Irausquin Blvd. direccion Oranjestad.
Fase 3. Dialuna 17 di juni 2019 lo cera e rotonde di Eagle Bowling completo y banda West te cu rotonde di Hospital pa por pone e ultimo capa di asfalt. Dialuna dia 24 di juni 2019 e caminda lo habri bek. Desviacion ta via Schotlandstraat y Caya Musica.
Fase 4. Diaranson 19 di juni 2019 lo cera e banda Oost for di rotonde di Eagle Bowling te cu rotonde di Hospital pa por pone e ultimo capa di asfalt. Dialuna dia 24 di juni 2019 e caminda lo habri bek. Desviacion ta via Schotlandstraat y Caya Musica.
Fase 5. Dialuna dia 21 di juni 2019 lo cera e banda Oost for di e T-kruising (TNO) te cu rotonde di Hospital pa pone e ultimo capa di asfalt y e caminda lo habri dia 24 di juni 2019. Desviacion ta via Schotlandstraat.
Por ultimo ta importante pa menciona cu fechanan di trabounan riba L.G. Smith Blvd. por wordo cambia si haya inconveniencianan.
En conexion cu e trabounan menciona Mota Engil, Departamento di Obra Publico y KPA ta pidi pa tene cuenta cu e inconveniencianan cu lo por surgi pa cual nos ta pidi nos disculpa.