DOW cu hopi trabao drechando buraconan riba caminda

E ultimo simannan Aruba a haya awasero continuamente, nos tera ta satura y esey a trece cu ne cu riesgonan ta grandi pa nos careteranan aworakinan segun Marlon Croes, director di DOW. Actualmente por a ripara varios buraco na diferente careteranan causa pa e awasero continuo aki, y por mira diferente grupo di trahadonan di DOW drechando esakinan districto pa districto.

Nan ta grater caminda di santo pa fin di aña pero si awa sigui yobe asina, e ta bay sinti manera si ta ‘hiba awa lama’ segun sr. Croes. Pero no ta kita afo cu DOW ta keda haci nan maximo esfuerso pa garantisa y caba e trabaonan pa e hendenan durante temporada di fin di aña tin un caminda cu nan por core trankil. A drenta algun keho cu na st. Cruz por ehempel por a tuma nota cu a yena buraco cu graniet enbes di asfalt, pa cual segun sr. Croes esaki no ta algo comun, e ta splica cu e dia ey nan no por a haya asfalt dus a uza santo temporalmente y pa e siguiente dia pa yena esaki cu asfalt.

Hopi santo ta subi caminda ora cu awa yobe, dus tin gruponan ta Sali diasabra y diadomingo pa por kita e santo for di caminda. Pa locual ta e buraconan, DOW ta yenando esaki constantemente, cu scouts coriendo rond mirando unda e buraconan ta, planifica e trabao cu e team y purba na cubri tur area afecta. “Si bo puntra nos si esaki ta e manera ideal, nos lo bisa bo no, pasobra loke nos ta desea di haci ta echt corta e caminda, sak’e y yen’e bek, pero e ta bay tuma mas tempo, e ora ey bo ta keda na e sistema bieuw di patch e camindanan aki”, segun sr. Croes.

DOW ta haya cu nan tin cu cambia nan operacion, pa ora cu nos sali di e situacion di awa cu nos ta awo, pa bay bek over na unda tin hopi buraco y corta e careteranan bek y yena nan. Loke ta yuda nan tambe ta cu Carnaval a wordo posponi comienso di otro aña, cual ta duna DOW mas espacio pa haci mas cosnan aworaki.

Comments

comments