Diahuebs mainta un awasero torencial a cay ariba Aruba den oranan di mainta pa merdia, unda cu Aruba su tera ta satura pa cual DOW a subi caya pa asina haci nan recorido den e zonanan cu ta wordo mas afecta durante yobidanan. Sr. Marlon Croes, director di DOW cu e relato.
DOW a subi cayanan hopi trempan pa wak e puntonan debil di semper, manera Madiki, Pos Chikito, pa asina zorg pa nan no inunda e caya pa no causa molester pa e bicindario. Madiki y Zuster Dorothea tabata bou control, pero Pos Chikito tabata un menasa pa cual a pone e pompnan traha pa asina evita cu e ta bay for di control. A tuma medidanan preventivo of corectivo.
Esaki a bin na tempo pa cual Sr. Croes ta splica cu e tarea di DOW ta pa prome cu e temporada di horcan tur e rooinan ta haci limpi completamente. Solamente e red di infrastructura dilanti di Smith Boulevard, cerca di lama a haci e tuberia limpi. Pero un of 2 dia prome cu e mal tempo yega, ta bay haci e trabao atrobe. Si haci’e muhco trempan, e tuberia ta yena cu santo y sushi, y ora cu e awa bini, e awa ta plok. P’esey a haci e limpiesanan na ultimo momento, un of dos dia prome cu e mal tempo yega.
Pa loke ta e rotonde di Cumana, akinan tin un duiker grandi traha y un ta wordo traha na e otro banda, pa asina yuda cu e level den diferente haltura cu ta stroba e awa di core. Despues di diahuebs, e personal di DOW a mobilisa caba diasabra cu a pasa, ora cu awa ta yobe. Nan a subi caya pa supervisa cualkier problema, pero no tabata tin nada particular, solamente na e rotonde di Cumana, cu mester a wordo cera diabierna y diasabra anochi pa siguridad di tur hende. E team di DOW ta cla pa sali afo pa opera, den caso cu esaki ta necesario, segun Sr. Marlon Croes, director di DOW.