Diaranson mainta, Douana a bay den una accion di dos ora, di cual esey a sigui expande pa diahuebs, tambe cu dos ora.Esaki tabata relaciona cu e caso di un trahado di Douane cu a wordo atraca despues di a caba di traha.
Den un entrevista cu Sr. Eduard Maduro, di sindicato SADA, el a splica cu diahuebs, tanto Douana como Imigracion a uni forsa y asina forma un bloke sindical conhuntamente cu e tres sindicatonan cu ta representa Inmigracion, cual ta STA, TOPA y SEPPA. Den un reunion cu nan miembronan, a keda dicidi di manda un carta en bloke di e cuater sindicatonan aki pa e Minister nan concerni, den e casonan aki Minister Bermudez, cu ta representa Douane, Minister Dowers cu ta representa Inmigracion, y Minister di Transporte, Sr. Mike de Meza.
E parkeerplaats cu Triple A a designa desde cu a traha e afdak cu Solar Panel unda cu nan ta aloca Douane y Inmigracion mas bandi pabao banda di Directie Luchtvaart y e parti unda cu e miembronan no ta sinti nan mes sigur eynan. Esey tabata e prome punto di salida y e prome stap pa purba trece un poco trankilidad pa nan miembronan, pa asina nan ta sinti mas sigur ora di yega y sali for di pia di trabao.
Nan a pone claramente, den e carta cu e sindicatonan tabata kier un reunion urgente cu e ministernan y esey a tuma luga diabierna merdia, unda nan a trece nan preocupacion cerca e ministernan. Despues di a delibera un ora, nan a keda cla cu e parti aki unda cu e minister nan a bay di acuerdo, y nan tambe ta sinti cu e parti di siguridad mester keda na prome luga. E decision a wordo tuma, cu Douane y Inmigracion lo wordo traslada bek pa e parkinglot mas cerca di e edificio, unda nan tabata parkeer semper.
Segun Sr. Maduro, e caarchinan lo mester wordo activa bek, pero mester bisa cu e parti aki ta tras di lomba. Awo lo mester bay traha pa haci esaki mas sigur ainda. Un caso asina aki por pasa un biaha mas, y mester trata na haci e luga mas safe pa nan miembronan y e usuarionan di Airport.
Ariba e pregunta tocante e camaranan, e personal di siguridad di Airport cu mester ta mas activo pa cuida e propiedad di Airport pero tambe nan mesun propiedad, pa motibo cu cualkier cos cu pasa ariba e tereno tin regla, y con pa controla ken ta drenta of sali. Sr. Maduro a splica cu esey ta cay bou di Triple A y nan no sa con e richtlijn di Triple A ta pa cu esaki. El a sigui bisa cu enberdad tin camara, pero e tereno di Airport ta uno masha grandi. Den oranan di marduga, no tin hende na airport ta dura algun minuut prome cu yega na e sitio, den dado caso cu tin algo pasando. Pero loke ta trata esaki, Sr. Maduro a enfatiza cu e no sa con Triple A tin esaki bou di nan encargo, pero si e sucedido tabata un wake up call pa nan, pa nan wak con pa por eleva e parti di siguridad y purba di haci esaki mas sigur ainda.
Tur rond di Airport tin camera, y Sr. Maduro ta splica cu esaki ta keda na encargo di directiva di Triple A, con nan ta bay pak aan e situacion aki pa evita cu un caso asina bolbe sosode. Mester evita cu esaki lo por pasa cu un bishitante di Airport ariba tereno di Airport y pa es motibo aki tambe, segun Sr. Maduro, Triple A mester haci mas pa prevencion y cuido di nos bishitantenan y tambe e trahadonan di Airport.