Willemstad Curacao: Ministerio Públiko (OM) Kòrsou a hasi demanda awe den kaso “Campo Allegre”. Ta trata di e kaso di tripel asesinato djadumingu 24 di yüli 2016 pa 4 or di mainta riba lugá pa stashoná outo di Campo. E dia en kuestion “Appa” Emerencia, “Pulun” Rosa i Leonard a pèrdè nan bida na momentu ku nan a keda likidá pa 54 bala for di armanan outomátiko. Na e sitio polis a bin haña 66 huls bashí. Vários persona a duna den e kaso aki deklarashonnan kontra e 4 sospechosonan.
Fiskal di Ministerio Publiko ta konvensi ku ta trata aki di un likidashon den e mundu kriminal. Pa e asesinato e akusadonan lo a risibi 100.000 florin. “Un asesinato pa metanan finansiero i na unda e akusadonan no a mustra niun tiki duele pa loke nan a hasi. Nan a laga otro famianan desampara sin nan ser kerí. Kontra tipo di kriminal profeshonal asina por duna solamente un kastigu haltu di prison”, di akuerdo ku Fiskal den su rekisitorio.
Awe Fiskal di Ministerio Públiko (OM) a hasi demanda pa 10 aña prisòn pa L. “Pushi” G. (1983), 14 aña prisòn pa G. “Black” G. (1989), bida largu pa J. “Kuchi” G. (1987) i bida largu pa R. “Bomba” C. (1987).
Famia di defuntunan Emerenciana i Leonard a pidi kada a un 2.390 florin komo rekompensa pa e gastunan di entiero.
E kaso ta kontinuá awor ku defensa. Na tur 4 abogado tin ku hiba palabra i 4 sospechoso tin ku haña nan ultimo palabra. Tin un posibilidat ku Wes ta disidí awe tardi ku ta kontinuá otro siman djabièrnè, dia 19 di òktober 2018, ku e kaso.